Sanidá y les comunidaes autónomes trabayen yá na planificación de la desescalada a partir del 26

|
Pablo Ignacio Fernández Muñiz xunta telemática Conseyu Interterritorial Salú

Pendiente entovía de la so aprobación el xueves nel Congresu, una segunda prórroga allargará l’estáu d’alarma pol coronavirus hasta’l 26. El Ministeriu de Sanidá yá trabaya xunto coles autonomíes “pa dir planificando la desescalada” de la reclusión dende esi día “si too va bien”, confirmó’l conseyeru Pablo Ignacio Fernández Muñiz.

Na tarde d’ayeri celebróse una xunta telemática del Consejo Interterritorial del Sistema Nacional de Salud na que participen los responsables del mininsteriu y de les comunidaes. Na mesma Asturies recibió una felicitación “polos bonos resultaos que tamos teniendo” apuntó’l conseyeru de Salú, que destacó tener “una de les inicidencies más baxes y ún de los indicadores de mortalidá más baxos” del conxuntu del Estáu.

Fernández Muñiz tamién confirmó que se formó un grupu de trabayu “ente toles comunidaes autónomes y el ministeriu pa dir planificando la desescalada que se va tener qu’empezar a facer previsiblemente si too va bien cuando fine esti periodu adicional d’otros 15 díes de reclusión”. Nesi sen, el primer pasu ye “tener un llistáu d’infraestructures disponibles pa midíes d’aislamientu pa les persones que lo necesiten”.

Otra manera, Fernández Muñiz confirmó que “vamos aumentar n’Asturies los númberos de PCR que vamos facer”, los más fiables según los téunicos, col complementu de los test rápidos qu’acaben de llegar dende Madrid “que serán una ayuda”. Hasta ayeri a les 20 hores, últimos datos oficiales, el Llaboratoriu de Microbioloxía del HUCA procesó 17.243 muestres pa determinación de la COVID-19 por PCR.

El día con menos positivos nuevos

Esti llunes foi’l día con menos positivos nuevos n’Asturies dende que se centralizaron los datos col estáu d’alarma’l 16 de marzu. En total rexistráronse 33 pa poner l’acumuláu en 1.679, rebaxando inclusive los 41 del domingu, meyores resultaos depués de los 49 del 17 y 22 de marzu y el xueves pasáu.

Por contra, ayeri hebo que llamentar 10 finaos más, lo que fai ascender la cifra dende l’entamu de l’andanciu a 96. La UCI tien 2 pacientes menos (74) y en planta hai ingresaos 13 más (377), con 22 curaciones (244).

Contador Estadistiques