“Si tuviera capacidá llegal, yá pesllara Asturies”, asegura Barbón

El presidente Adrián Barbón aplicaría midíes más drástiques si pudiera, según apuntó en respuestes a usuarios na rede social Twitter, onde ye mui activu. “Si tuviera capacidá llegal, yá pesllara Asturies”, aseguró nun mensaxe, al empar que pidió “cuarentena de 14 díes” a los qu’aporten al país.

“Llevamos diciendovoslo díes. Repetímoslo una vegada más: nun venís de vacaciones. Podéis ser un vector de contaxu poniendo en peligru la salú y la vida d’otres persones, como los vuesos amigos y familiares”, insistió Barbón. “Vamos ver el conteníu de la declaración del Estáu d’Alarma que güei aprueba’l Conseyu de Ministros”, apuntó n’otru mensaxe.

El socialista tamién indicó nos sos munchos tweets que “lo que yo tengo capacidá llegal d’atrancar, yá ta atrancáu”. Y asegura que “si tuviera la capacidá llegal, yá lo fixera” en respuesta a un usuariu que-y pidía, en llingua asturiana, “pieslla Asturies presi”.

Na imaxe, Barbón preside ayeri'l Comité de Coordinación d'Asturias Frente al Coronavirus COVID-19. Semeya obra d'Armando Álvarez.