Les cifres del paru siguen medrando: 2.493 persones más n’ochobre

Asturies supera la cifra de 70.000 paraos tres acumular 2.493 más n’ochobre. La cifra total ye agora de 70.062 tres trés meses siguíos de xuba, siendo los conceyos más afeutaos los turísticos por mor del final de la temporada y la llegada del mal tiempu.

124 n’agostu, 2.079 en setiembre y 2.493 n’ochobre. Son la cantidá de persones que quedaron ensin emplegu nos trés meses últimos, cifres que confirmen una ralentización de la economía que se da en tol Estáu.

La media estatal foi del 3,18 por cientu, 97.948 más, p’afitase en 3.177.659 paraos, mentes que la medra n’Asturies foi del 3,69 por cientu. Los territorios con peores datos son Illes Balears, con un 25,28 por cientu; La Rioja, con un 9,05 por cientu; y Castilla-La Mancha, con un 5,42 por cientu, siendo la única comunidá con rexistros positivos la Comunitat Valenciana, con un descensu del 0,15 por cientu, amás de la ciudá autónoma de Ceuta, del 0,74 por cientu.

Los conceyos asturianos más afeutaos foron los turísticos, casu de Cabrales (55 por cientu), Cangues d’Onís (30,77), Ribaseya (25,84), Llanes (23,39), Tapia (18,88) y Cuideiru (14,86). Tamién creció’l desemplegu n’Avilés (3,77), Xixón (2,61) y Uviéu (1,31).

En términos añales, el paru menguó n’Asturies un 3,52 por cientu, siendo la media estatal del 2,37 por cientu. Euskadi rexistra los meyores númberos, con un 5,78 por cientu de baxado, siguíu de Castilla y Lleón, con un 5,31 por cientu, mentes que vieron aumentáu’l desemplegu en comparanza con ochobre del 2018 Ceuta (6,36 por cientu), Canarias (0,98) y Illes Balears (0,73).

Contratación y Seguridá Social

Respeuto a la contratación, rexistráronse n’ochobre n’Asturies 37.212 colocaciones, un 10,23 por cientu más qu’en septiembre. Esto supone que nel mes últimu les oficines del Serviciu Públicu d’Emplegu (Sepepa) rexistraron una media de 1.200 contratos diarios.

Mentes, el número de cotizantes a la Seguridaá Social aumentó en 5.224 nel añu últimu (1,44 por cientu), hasta algamar los 369.137. Esta cantidad supón el meyor indicador pa ochobre dende’l 2011.

Na imaxe, Sotres, en Cabrales, conceyu que rexistró un aumentu del paru n'ochobre del 5 por cientu. Semeya obra de Mick Stephenson baxo llicencia CC BY-SA 3.0.