El paru medra en 2.079 persones

El mes de setiembre finó n’Asturies con 2.079 paraos, siguendo la dinámica d’agostu, cuando medró en 124 persones, por mor del final de la temporada de branu. En términos interañales, baxó en 2.993 desemplegaos, enllazando 72 meses de descensu.

El paru n’Asturies algama les 67.569 persones, lo que supón una medra del 3,17 por cientu, siendo la media estatal del 0,45 por cientu p’asitiar el total en 3.079.711. Namái trés territorios tienen peores cifres qu’Asturies esti mes, Cantabria (6,77 por cientu) Estremadura (4,31) y Illes Balears (3,95), mentes que rexistren les meyores cifres La Rioja (-6,14), Euskadi (-2,11) y Navarra (-2,08).

Ente los conceyos con más emplegu y población, en términos absolutos xubió n'Uviéu en 155 persones (1,11), en 115 n'Avilés (2,12) y en 622 en Xixón (3,24). El desempleguu baxó en catorce conceyos y creció nel restu.

En comparanza colos datos del añu pasáu, el país rexistra una baxada del 4,24 por cientu, mayor que la media estatal, que s’asitia nun 3,83 por cientu. Les comunidaes onde más mengua’l paru ye en Navarra (8,09), Euskadi (7,64) y Castilla y Lleón (7,01), medrando únicamente les cifres na ciudá autónoma de Ceuta (2,65).

Tocante a la evolución de l'afiliación a la Seguridá Social, nel añu últimu'l númberu de cotizantes aumentó en 3.967 persones, un 1,09 por cientu, hasta asitiase en 367.641. Por sectores d'actividá, la distribución de les altes llaborales repártese d’esta manera: réxime xeneral (291.517), autónomos (73.431), mar (1.536) y minería (1.157).