L’ALLA convoca’l II Premiu Nacional de Lliteratura Asturiana

Nel XLI Día de les Lletres Asturianes l’Academia de la Llingua Asturiana (ALLA) va facer entrega del II Premiu Nacional de Lliteratura Asturiana, gallardón de calter triañal que nació pa premiar una trayeutoria. La primer edición foi pa Xuan Bello.

La Xunta de la institución académica celebrada’l xueves dio’l preste a les bases de la convocatoria del II Premiu Nacional de Lliteratura Asturiana cola intención de “facer pública reconocencia del llabor normalizador que representa la creación lliteraria nel idioma d’Asturies y el fundamental papel que xueguen los y les escritores en llingua asturiana nel caltenimientu de la cultura del Pueblu Asturianu”. A él van optar namái los autores vivos, yá que’l gallardón nun se pue conceder a títulu póstumu, al igua que tampoco pue declarase ermu o xebrase.

El xuráu, que va tar conformáu pol presidente de la institución, Xosé Antón González Riaño –que va presidir el mesmu–, 3 miembros de l’ALLA, un representante de la Conseyería de Cultura, Política Llingüística y Turismu –que va llevar la secretaría–, y dos personalidaes “de reconocíu prestixu del mundu universitariu especialistes en lliteratura asturiana”, va encargase d’escoyer ente toles candidatures presentaes l’autor o autora merecedora del premiu valorando’l “conxuntu de toa una trayeutoria lliteraria, fecha a lo llargo del tiempu en llingua asturiana y la so contribución a la dignificación social del asturianu”. El ganador va recibir un medayón distintivu, gallardón que lleva venceyáu tamién una recompensa de 3.000 euros, el 8 de mayu na xunta estraordinaria de l’ALLA con motivu del XLI Día de les Lletres Asturianes, y la institución va editar “una pequeña antoloxía representantiva de la producción lliteraria del autor”.

Van poder presentar candidatures al II Premiu Nacional de Lliteratura Asturiana la propia ALLA, les instituciones culturales y llingüístiques de tol dominiu y cualquier miembru del xuráu que se conforme. Pa ello ha d’apurrise un escritu nel que se conseñen los méritos lliterarios del autor propuestu, asina como una aumesa representantiva de la so producción escrita –al rodiu de 50 páxines, enantes del 1 d’avientu.

Conceyu cola conseyera Piñán

El mesmu xueves de la Xunta, González Riaño aconceyó xunto cola conseyera de Cultura, Política Llingüística y Turismu, Berta Piñán, con motivu del comienzu de la llexislatura p’aldericar y tratar asuntos referentes a la política llingüística del Gobiernu nuevu y a la propia academia. Acompañaron a la docente y escritora nesti alcuentru Antón García, direutor xeneral de Política Llingüística, y Martín López-Vega, direutor xeneral de Cultura y Patrimoniu.

Na semeya, Bello nel so discursu tres recibir el primer Premiu Nacional de Lliteratura Asturiana nel Campoamor nel XXXVIII Día de les Lletres Asturianes.