L’ALLA convoca’l III Premiu Nacional de Lliteratura Asturiana y aumenta la so remuneración económica

Les entidaes culturales y llingüístiques, los miembros del xuráu y la propia Academia de la Llingua Asturiana (ALLA) yá pueden proponer candidates y candidatos al III Premiu Nacional de Lliteratura Asturiana qu’entrega la institución. De calter triañal, reconoz una trayeutoria y cuenta con Xuan Bello (2017) y Xuan Xosé Sánchez Vicente (2020) como ganadores de les dos primeres ediciones.

Esti gallardón, creáu nel añu 2016 y concedíu per primer vegada nel 2017, naz “pa facer reconocencia pública del llabor normalizador que representa la creación lliteraria y del papel fundamental que xueguen los y les escritores en llingua asturiana nel caltenimientu de la cultura d’Asturies”. Según espliquen les bases, “premiaráse al conxuntu de toa una trayeutoria lliteraria, fecha a lo llargo del tiempu en llingua asturiana,y a la so contribución a la dignificación social del asturianu”.

Hasta’l 9 d’avientu ye posible presentar candidatures por parte de les entidaes culturales y llingüístiques del país, la propia ALLA o los miembros del xuráu, nesti casu hasta quince díes enantes de la xunta na que se va decidir la persona que lleve’l premiu, al traviés d’escritu dirixíu l’ALLA onde se conseñen los méritos lliterarios de la persona propuesta xunto a una amuesa representativa de la so producción escrita (alredor de 50 páxines). El III Premiu Nacional de Lliteratura Asturiana va entregase nel LXIV Día de les Lletres Asturianes y consiste nun medayón distintivu, una recompensa económica de 5.000 euros –2.000 más que nes convocatories anteriores– y la edición d’una pequeña antoloxía representativa de la so producción.

El xuráu va tar compuestu por Xosé Antón González Riaño, presidente de l’ALLA; trés miembros de númberu de la institución; un representante de la Conseyería de Cultura, Política Llingüística y Turismu; dos personalidaes de prestixu reconocíu nel mundu universitariu, especialistes en lliteratura asturiana; y Xuan Xosé Sánchez Vicente, ganador de la edición anterior. El premiu nun pue xebrase en dos autores, quedar ermu o concedese a títulu póstumu, y va fallase a lo caberu de xineru.

Na semeya, Xuan Xosé Sánchez Vicente da'l discursu nel Aula Magna de la Universidá d'Uviéu llueu de recibir el II Premiu Nacional de Lliteratura Asturiana nel XLI Día de les Lletres Asturianes, que se retrasó a ochobre pola situación sanitaria pola pandemia de COVID-19.