Barbón ha d’esperar al llunes pa ser presidente d’Asturies

Como yá s’intuyía pola falta d’alcuerdu ente la FSA y Podemos, Adrián Barbón ha d’esperar al llunes pa ser investíu como presidente d’Asturies. Na votación del vienres, na que necesitaba la mayoría absoluta, algamó 22 apoyos por 23 astenciones.

Yá’l miércoles, na xornada previa del Plenu d’Investidura, Daniel Ripa, secretariu xeneral de Podemos, anunciaba que l’alcuerdu colos socialistes taba “verde”, anque ensin dar por pesllada la negociación. Un día enantes entregara a la FSA un documentu con propuestes p’apoyar la investidura de Barbón compuestu por 13 bloques con dellos puntos caún.

Finalmente nun s’averaron les posiciones nes hores siguientes y Barbón namái sumó l’apoyu de los dos diputaos d'Asturies pela Izquierda, coalición cola llegara’l miércoles a un alcuerdu d’investidura. Ensin la opción de votar en contra pol reglamentu de la Xunta Xeneral, Podemos, PP, Ciudadanos, Foro y VOX astuviéronse na primer votación, na que yera necesaria la mayoría absoluta, polo que’l llavianés va tener qu’esperar al llunes a la segunda, convocada pa les 11 hores, na que-y val cola mayoría simple que yá tien.

La sesión de güei abrióse coles intervenciones de los voceros de tolos grupos parllamentarios, con derechu a réplica pal futuru presidente d’Asturies. Nes intervenciones, Lorena Gil, de Podemos, acusó a Barbón de nun tener voluntá real.

Mentes, el PP y Ciudadanos refugaron apoyar la oficialidá, tema qu’ocupó gran parte de les intervenciones d’Ignacio Blanco, de VOX, con posiciones tamién contraries. Foro, pela so parte, acusó al socialista de proponela ensin tener consensu nel so propiu partíu.