El Lealtad conoció la derrota en Getafe

Los de Villaviciosa van tar nel bombu de Las Rozas xunto col Marino, únicu asturianu sobreviviente tres el pinchazu del Caudal.

Nel peor momentu, nel partíu decisivu, el Lealtad conoció'l saborgu de la derrota. Tres una temporada de matrícula, l'equipu maliayu viose superáu por un filial del Getafe, que lideraos por Hugo Duro, xugador con esperiencia en Primera nun equipu que va xugar n'Europa la campaña que vien, salió a pola remontada dende'l xiblíu del árbitru.

Asina, en 25 minutos, con dos tantos del delanteru azulón de 19 años y ún de Poulolo, el conxuntu madrilanu yá consiguía da-y la vuelta a una eliminatoria que taba mui de cara pa los maliayos tres el 2-0 de Les Caleyes. Sicasí, hebo una reaición asturiana tímida y enantes del descansu Saha anotaba un gol que daba'l pase momentaneu a los de Samuel.

La segunda metá foi de sufrimientu pal Lealtad, que cuando yá veía l'ascensu cercanu escapóse-y por mor d'un disparu de Miguel Ángel nel 87 énte'l que nada nun pudo facer Javi Porrón. Al final, derrota por 4-1 (4-3 nel global) qu'impide al conxuntu de Villaviciosa algamar l'oxetivu pela vía rápida, anque tendrá otra oportunidá a dos rondes pa poner el ramu a una campaña histórica de los maliayos.

El Cova, goliáu en Bergantiños

A les 16.30 hores el Lealtad va tar nel bombu de Las Rozas pal sortéu de la segunda eliminatoria pol ascensu a Segunda División B, que se va entamar tres el de los equipos de la categoría de bronce pa xubir a Segunda División A. Xunto a él va tar el Marino, que nun falló énte'l San Ignacio y venció por 2-0 con tantos d'Álex Arias y Jorge Cayarga, faciendo bonu'l 0-0 de la ida en Gasteiz.

Nun pudo facer lo propio'l Caudal, que tornó de Canarias tamién con un empate ensin goles. Un gol de Ramón pal Unión Viera, conxuntu debutante nuna fase d'ascensu a Segunda B, nel minutu 29 punxo'l choque mui pindiu pa los mierenses, que sólo pudieron igualar con un tantu insuficiente de Cristan nel 85, zarrando asina una temporada irregular nel que la inestabilidá, con munchos cambios nel bancu, marcó la so trayeutoria.

El cuartu equipu asturianu clasificáu, el CD Covadonga, tampoco pudo avanzar de ronda al topase con un Bergantiños mui superior. El segundu clasificáu gallegu, que yá ganara por 0-2 nel Juan Antonio Alvarez Rabanal, golió por 5-0 a los uvieínos n'As Eiroas.

Semeya propiedá del Club Deportivo Lealtad.