El Lealtad viaxa a Getafe a zarrar l'ascensu a Segunda División B

|
Lealtad 2-0 Getafe B (26 de mayu del 2019)

Los maliayos quieren facer bonu'l 2-0 de Les Caleyes. Marino y Caudal xueguen en casa pa pasar de ronda tres un empate ensin goles.

El Lealtad pretende facer plenu esta temporada y finala ensin perder nin un sólo partíu de los 40 lligueros que disputaría. Un resultáu que-y daría l'ascensu a Segunda División B al conxuntu de Villaviciosa y que supondría un récor pa la historia del club y del fútbol asturianu, anque tamién-y valdría cayer pela mínima col Getafe B, o por dos goles nel casu de marcar, pa consiguir l'oxetivu de tornar a la categoría de bronce un añu depués.

El partíu va disputase'l domingu a les 11 hores –media hora enantes de lo previsto por mor de les altes temperatures que s'esperen– na Ciudad Deportiva del Getafe, instalaciones qu'impiden un desplazamientu masivu de l'afición del Lealtad. El club madrilanu unvió 70 entraes al club asturianu, polo que se cancelaron tolos autocares organizaos.

Samuel va poder disponer del so once de gala pal partíu decisivu, mentes que'l Getafe B recupera a Miranda, ún de los sos xugadores más destacaos esta temporada, tres un partíu de sanción. Como anéudota, la espedición asturiana va dormir nun colexu mayor por mor de la falta d'agospiu na Comunidad de Madrid y redolada por mor de la celebración de la final de la Lliga de Campeones ente'l Liverpool y Tottenham Hotspur nel Wanda Metropolitano.

El Cova, cerca de la eliminación

La derrota nel Juan Antonio Alvarez Rabanal col Bergantiños por 0-2 dexa al CD Covadonga a piques de la eliminación. Los de Fermín Álvarez xueguen n'As Eiroas el domingu a les 18 hores cola necesidá de remontar al equipu gallegu si quieren siguir vivos nes eliminatories pol ascensu.

Meyor lo tienen el Marino y el Caudal, anque tornaron Asturies con un marcador engañosu de 0-0. L'equipu de Lluanco recibe al vascu San Ignacio'l domingu a les 17 hores, mentes que'l de Mieres va facer lo propio col canariu Unión Viera a les 18 hores.

Na imaxe, los xugadores del Lealtad celebren ún de los sos tantos énte'l Getafe B. Semeya propiedá del Club Deportivo Lealtad.

 

Contador Estadistiques