El Lealtad, ensin marxe d'error col Formentera

El Marino, que s'enfrenta a la Mutilvera, tamién va xugar la ida fuera de casa.

Dos equipos asturianos caltienen opciones de dar el saltu a la Segunda División B la temporada qu'entra. El Lealtad, campeón del grupu II de Tercera, perdió la primer opción d'ascender direuto col Getafe B (4-3 nel global pa los madrilanos) y agora ha de pasar dos rondes p'algamar l'oxetivu de retornar a la categoría de bronce, yá ensin marxe d'error.

Delantre nun va tener un rival fácil, el Formentera, cuartu del grupu balear, que dexó nel camín al Cacereño tres empatar a ceros goles na isla y a dos n'Estremaúra. El choque va tener llugar el domingu a les 12 hores y los de Villaviciosa van tener enfrente a un equipu nel que destaca la presencia del ex central del Sportingu Samuel y al canteranu del Uviéu Omar Álvarez, ex xugador del Marino, ente otros clubes.

El club de Lluanco, mentes, viaxa a Navarra pa enfrentase mañana, a les 18 hores, a la Mutilvera, equipu contra'l que xubió como campeón la temporada pasada'l Vetusta. Nesta ocasión tornen a intentar l'ascensu dende la tercer posición depués d'eliminar al Náxara tres empatar ensin goles en casa y a un tantu en La Rioja.

Na imaxe, los xugadores del Lealtad celebren el gol de Saha na Ciudad Deportiva del Getafe. Semeya propiedá del Club Deportivo Lealtad.