González Orejas, direutor xeneral de RTPA en funciones tres la marcha d'Antonio Virgili

Contó col sofitu de 6 de los 8 miebros del conseyu d'alministración del ente.

Francisco González Orejas, direutor de Producción y Esplotación de RTPA, va ocupar de manera interina la direición xeneral de la canal pública. La decisión d'Antonio Virgili de dexar el cargu, por motivos personales, obliga a nomar a un sustitutu que cuenta col sofitu de tolos grupos representaos nel conseyu (PSOE, PP, IX y Foro), cola oposición única de los dos miembros de Podemos, formación que defende l'entamu d'un concursu públicu pa la escoyeta del direutor xeneral.

Nacíu en Mieres nel 1957 y con pasáu en RTVE, el periodista llegó a ser direutor d'informativos del centru territorial. Dende'l 2015 ta venceyáu cola RTPA tres la integración de la Productora de Programes del Principáu d'Asturies (PRODA), de la que foi xerente dende'l 1989, nel ente públicu de comunicación.

Otra manera, el conseyu d'alministración de RTPA afaló a la Xunta Xeneral a nomar lo más pronto posible un direutor xeneral.

Na semeya, un momentu del axuntamientu del conseyu d'alministración de la RTPA.