La XDLA solicita la comparecencia del direutor de RTPA na Xunta Xeneral énte la menor presencia del asturianu

Más d’añu depués de la comparecencia d’Antonio Virgili na Comisión de Control de RTPA, la XDLA esixe que’l so relevu, Francisco Orejas, acuda a la Xunta pa esplicar la llaceriosa situación del asturianu nel ente. Tamién reclama a la FSA, Podemos y Asturies pela Izquierda qu’ellaboren el mandatu-marcu y el contratu-programa que lu desarrolle, que "tendríen que tar aprobaos hai cuatro años".

La Xunta pola Defensa de la Llingua Asturiana (XDLA) torna a denunciar que la RTPA sigue ensin cumplir el compromisu marcáu nel Estatutu d'Autonomía, la Llei d'Usu del Asturianu y la mesma norma de creación de RTPA, “qu'establecen que los medios públicos tienen que ser una parte activa nel procesu de recuperación del patrimoniu llingüísticu del país”. Considera que yá ye hora de que los grupos parllamentarios “cumplan col so llabor y ellaboren el mandatu-marcu y contratu-programa que lu desarrolle y qu'asina sía la mesma Xunta Xeneral la que determine'l porcentaxe d'emisión en llingua asturiana na radiotelevisión pública”.

Nesi sen, diríxese a les formaciones “que dicen defender la llingua asturiana”, citando a la FSA, Podemos y Asturies pela Izquierda, pa que “muestren qu'esi compromisu va más allá de les declaraciones”. Asina, solicita la comparencia del direutor en funciones del ente públicu de comunicación en sede parllamentaria na Comisión de Control de RTPA pa que dea esplicaciones sobre la mengua de la presencia del asturianu en TPA y RPA mientres el 2019.

“L'añu pasáu nun s'estrenó nengún programa nuevu n'asturianu na televisión y hai más de dos años que nun doblen nenguna película al asturianu –dende'l 8 de setiembre de 2017– y muncho menos programación infantil na nuestra llingua –dende'l branu del 2016–. Too ello a pesar de los 70.000 euros que la Dirección Xeneral de Política Llingüística regaló a la dirección d'una cadena que yá recibe 23.000.000 euros pa facer televisión paez que namás en castellanu, porque la TPA ta promocionando programes nuevos toos nesta llingua, lo que muestra que la cadena sigue cola so política de marxinación hacia'l patrimoniu llingüísticu d'esta tierra”, critica la XDLA.

Nel casu de RPA la presencia del idioma ye de 50 minutos selmanales, un boletín de noticies de diez minutos diarios de llunes a vienres al meudía. Sicasí, del 27 d’avientu hasta güei, que se retomó l’espaciu, ésti fíxose en castellanu pola ausencia de los periodistes que s’encarguen d’él. “Nun ye posible nenguna política llingüística seria nel sieglu XXI ensin cuntar colos medios públicos de comunicación como exa principal. Los fechos tán demostrando que los partíos defensores del asturianu o bien nun lo saben o bien nun-yos da muncho más, porque si non nun s'esplica esti desdexamientu”, fina la XDLA’l so comunicáu.

Semeya obra d'Enrique G. Cárdenas baxo llicencia CC BY 3.0.