Virgili arrenuncia al so cargu como direutor xeneral de la RTPA

Motivos personales ye la razón alegada al conseyu d’alministración de la RTPA por Antonio Virgili p’arrenunciar al so cargu como direutor xeneral del ente públicu de comunicación, que va facer efeutiva’l mes próximu. Iniciativa pol Asturianu solicita al Gobiernu un sustitutu “qu’apueste pol asturianu y el gallego-asturiano”.

Direutor xeneral de la RTPA dende avientu del 2011, cuando yera direutor d’Antena, por decisión del conseyu d’alministración pa cubrir la salida de Juan José Guerenabarrena, tuvo en funciones hasta payares del 2015. Nesi momentu la FSA, el PP y Izquierda Xunida (IX) alcordaron confirmar nel cargu a Virgili, qu’agora abandona poco enantes de finar el so mandatu.

El periodista tresmitió ayeri a los conseyeros la so decisión por motivos personales, que va confirmar el 4 de marzu na reunión próxima del conseyu d’alministración del ente. La xestión de Virgili tuvo marcada poles numberoses crítiques recibíes dende coleutivos de defensa del asturianu pola probe presencia del mesmu na programación de la TPA y la práuticamene nula na RPA.

Importancia del ente na normalización

Tres conocer l’anuncia de Virgili, Iniciativa pol Asturianu emitió un comunicáu nel qu’esixe a los partíos con representación nel conseyu d’alministración “que nomen un direutor o direutora qu'apueste por polítiques de programación que contribuyan a normalizar l'asturianu y el gallego-asturiano”. Recuerda que los medios de comunicación “tienen un papel central a la hora de revertir l'actual procesu de minorización del asturianu y el gallego-asturiano, oxetivu qu'agora comparten la mayor parte les fuercies polítiques representaes nel conseyu d'alministración”.

Esti coleutivu critica que mientres la xestión del hasta agora direutor xeneral “la RTPA retrocedió notablemente nesi oxetivu, pasando del tope máximu del 5 por cientu d'emisiones n'asturianu que llegó a algamar hai cuasi una década a l'actual 1 por cientu”, polo que considera que ye momentu de “dar un xiru a l'actual situación y apostar d'una vez por toes por una RTPA que contribuya a normalizar l'asturianu y el gallego-asturiano”.