Echa a andar la cuenta atrás pal 8-M

Torna a convocase una fuelga xeneral feminista de 24 hores con motivu del Día Internacional de la Muyer y hasta esa xornada entámense actividaes en toda Asturies.

La Comisión 8-M Asturies vien trabayando dende meses atrás nesta convocatoria. Inclusive acoyó'l IV Alcuentru Estatal del 8-M el pasáu mes d'ochobre, onde se decidió l'apuesta por un paru feminista nuevu de 24 hores nos mesmos cuatro exes que na d’esti añu, esto ye, paru de cuidaos, llaboral, consumu y estudiantil, depués del ésitu de la convocatoria del añu pasáu, con una manifestación histórica en Xixón a la qu'acudieron 50.000 persones, según la organización.

A falta de 8 díes pa la cita, cola intención de llamar a la movilización, van entamase delles aiciones y actividaes baxo'l lema '8 díes de revuelta'. Asina, la Comisión 8-M llama dende güei a les muyeres asturianes a colgar el mandil de la so ventana "pa visibilizar los cuidaos a les que nun pueden parar", y mañana al meudía a acudir a les places conceyos del país col tendal y el carrín de la compra.

Pal domingu va entamase un vermú feminista a les 12.30 hores na plaza'l Paragües d'Uviéu na que Les Greques y Las Sangunderas va poner la música. Les actividaes van siguir el llunes y el martes con un Antroxu Feminista, mentes que'l miércoles va ponese una rueda de prensa xunto a muyeres de la cultura pa dar a conocer a los medios la fuelga del 8-M, y el xueves una aición énte la FADE contra la precariedá llaboral.

El vienres, 8-M, día de la fuelga xeneral feminista de 24 hores baxo'l lema 'Si nosotres paramos, párase'l mundiu', tán previstes concentraciones nes places conceyos a les 12 hores. De tarde, a les 19 hores, va tener llugar en Xixón la gran manifestación con salida de la plaza de toros.