“El movimientu feminista n’Asturies tenía nidia l’apuesta por un paru de 24 hores el 8-M”, señala Alejandra Matallanas

El 8 de marzu del 2019 va entamase una fuelga xeneral feminista de 24 hores. Ye la principal decisión que sal del IV Alcuentru Estatal del 8-M qu’acoyó Xixón, cola participación de más de 600 muyeres, y la postura que defendió’l movimientu feminista asturianu.

Alejandra Matallanas, vocera de la organización del eventu, asegura que Asturies “tenía nidio l’apuesta por un paru de 24 hores el 8-M”. “Nun podemos dar marcha atrás, porque los problemes que denunciamos esti añu siguen vixentes, como amuesa l’asesinatu d’una muyer en Girona a manes de la so ex pareya y l’atropellu de les sos dos fíes del que nos enteramos mientres l’alcuentru”, añadió.

La postura asturiana yera mayoritaria ente les delegaciones presentes, polo que de Xixón salió aprobada la convocatoria d’una fuelga xeneral de 24 hores pal 8 de marzu que s’organiza nos mesmos cuatro exes que na d’esti añu, esto ye, paru de cuidaos, llaboral, consumu y estudiantil. Cola fin d’ampliar la representación y diversidá del movimientu feminista, nel alcuentru entamáronse grupos de trabayu pa incorporar les particularidaes de les muyeres del mundu rural o de les muyeres migrantes, o una comisión de violencies machistes, que tendrán continuidá na asamblea próxima p’acabar de poner les bases d’un 8-M que promete superar la histórica convocatoria d’esti añu.

D’igual forma, el movimientu reafirmóse en Xixón nos trés pegoyos nos que se basa dende qu’echara andar. Asina defínese como “antipatriarcal; anticapitalista, porque esti sistema económicu provoca una doble esplotación de les muyeres; y antirracista”.

“Tamos mui arguyoses de lo que construyimos equí”, espresa Matallanas recordando lo que se vivió na manifestación de Xixón y el pesu que ta garrando’l movimientu feminista n’Asturies, afitando una estructura que yá llega hasta les ales del país y al mundu rural. “N’Asturies danse unes particularidaes mui interesantes, como que na rueda de prensa previa al 8-M hubiera presencia de muyeres representantes de tolos sindicatos, dende la CNT a la UXT, o la organización d’una rede pa sofitar el paru con grupos d’homes pa cuidaos y lactancia mientres la fuelga”, destaca.

Algame internacional

Coincidiendo cola cita xixonesa, les muyeres d’Alemaña, Bélxica y Italia entamaron alcuentros pa siguir el mesmu camín entamáu nel Estáu: fuelga pal 8-M, Día Internacional de la Muyer. Les sos representantes escusáronse por nun poder tar en Xixón, pero sí hebo presencia de feministes d’otros países, como Francia, Nicaragua o Portugal.

“Texer una rede internacional que vaya d’Arxentina a Polonia, dos llugares onde esiste una falta de llibertá importante, como podemos comprobar col tema del albuertu, ye mui importante”, destaca Matallanas. En xineru, nun llugar entovía, por confirmar, celebrárase’l V Alcuentru Estatal 8-M que pondrá les bases definitives a la fuelga convocada en Xixón pal 8-M cola fin de facer otra vuelta historia en defensa de los derechos de les muyeres y esparder el mensaxe en tol planeta.

Na semeya, un momentu del alcuentru celebráu nel Centru Municipal Integráu Pumarín-Xixón Sur.