Defender l’asturianu

Nesti mundu globalizáu ye normal entrugase si tien sentíu mantener l’asturianu.

Ye verdá que l’asturianu  tien poca tradición escrita, que munches persones somos analfabetes n’asturianu, que’l retrocesu na reciella ye más que evidente.

Ye verdá que nun ta fecha la llabor de normalización y munchos falamos un asturianu entremecíu  y patrimonial. Por exemplu, toi ermoliu pol futuru políticu del nuesu país: nun me sal nin me suena bien tar esmolecíu; anantes que dicir esmolecíu digo preocupáu. Otru exemplu ye qu’hasta que fui mui mayor y entamé a lleer n’asturianu, nun supe que l’esquilu llamábase esguil.

Entós, ¿por qué defendo la llingua asturiana?  Dempués de muncho pensalo, la mio conclusión ye que defendo l’asturianu porque tengo derechu a facelo.

Los derechos nun se negocien, nin s’espliquen, nin se discuten, úsense, llúchense, pídense…

L’asturianu ye la llingua de mio ma, de les mios güeles y tataragüeles. Xente que nació trabayando y morrió trabayando. Xente que foi oprimida por unes élites que despreciaben la so llingua materna y ríense delos nun pudieron dir a escuela y falaben de forma natural la llingua asturiana.

De bien pequeñu aprendí que l’asturianu yera falar mal. Alcuérdome d’una vegada que me ri col restu la clase d’un collaciu que dixo miagar en vez de ‘maullar’, que yera una pallabra que deprendi pasaos los 8 o 10 años, porque pa min los gatos miaguen. Anque sepa que se diz ‘maullar’, dientro de la mio cabeza miaguen y miagaran mientres viva. Como  pela nuichi sona’l curuxu y necesito pensalo pa entender que’l que sonó foi’l cárabo.

Pero mientres munchos años interioricé que falar n’asturianu taba bien en casa y en pueblu, pero nun taba bien pa les coses series. Necesité munchos años pa dame cuenta qu’a min me presta falar asturianu; que cuando soi realmente llibre ye cuando siento n’asturianu. Y tardé munchos más años en ser quien a escribir n’asturianu, como toi faciendo agora. Tardé munchos años, por tantu, n’entender que tengo derechu a ser yo.

Naide nun me puede decir cómo tengo que falar o cómo tengo qu’escribir. Eso llámase llibertá.

Agora ta sobre la mesa la oficialidá. Deféndola, pero nun me quita’l sueñu. Creo que la oficiliadá, como la república, como tolos derechos, nun se proclamen, conquístense colos fechos.

Tenemos que defender y trabayar por una cultura asturiana viva, una cultura fecha dende la conciencia de la diversidá. Un mundu diversu con munchos polos de produción cultural, de pensamiento ye un mundu munchu más resiliente. Munchu más difícil de dominar, ye tamién un mundu más ricu y más amable pa vivir nél. Construyir esi mundu ye un trabayu dende la ciudadanía como consumidores d’esa cultura, pero ye tamién un trabayu de les alministraciones.

Les subvenciones a la publicación de llibros n’asturianu son bien escases, pero nun se trata de que se publique más, sinón de que se llea más. Les biblioteques públiques y les biblioteques de los colexos tienen que tener un fondu grande de llibros fechos n’Asturies. Tamos falando d’inversiones pequeñes que tendríen gran repercusión. Pero non sólo hai que meter los llibros nes biblioteques; tamién hai que trabayar por sacalos a la cai con feries de llibros asturianos. Facer que la xente llea y piense ye’l meyor trabayu que podemos facer dende les alministraciones públiques.

La música tamién ye cultura. Nun me gusta un mundu onde les industries deciden que productu industrial vamos sentir. La llibertá ta reñía cola uniformidá y el pensamientu únicu. Tenemos una radio y televisión públiques que tien que defender la música asturiana, toda. La TPA tien fecho delles de coses, pero nun ye suficiente. A mí préstame pola vida sentir un buen canciu de tonada, pero nun ye la única música que se fai n’Asturies. Nun se trata de fosilizar la nuesa cultura, sinón de caltenela viva. Otru camín de difusión de la música son los conciertos, avezar a la xente, sobre manera la xente mozo, a sentir la música en vivo, con conciertos na cai y nos teatros de continuu.

En cuantu a la producción audiovisual, sobre manera pa los rapacinos, la situación ye munchu peor. Una televisión pública nun pue dedicase a repetir capítulos de Bob Esponja. Les grandes industries tiren los precios porque faen les perres vendiendo chorraes cola cara de Bob Esponja. La so inversión ye meter a la xente nuna rueda de consumu d’usar y tirar.

La televisión pública, española o asturiana, tien que servir pa distrubuyir los bonos productos que nun tán nos circuitos comerciales. Y eso tien audiencia.  ¿Ónde tán los númberos d’audiencia de la serie Los Bolechas n’asturianu na TPA? Hai públicu pa les coses bien feches y lo público tien que ser canal de distribución pa eses coses que nun vienen de les grandes factoríes industrial-culturales.

La TPA tenía que dar los sábados y domingos varies hores de programación infantil y pa la xente mozo. Porque les persones con ciertu nivel socio económicu y cierta inquietú cultural tenemos medios pa que la nuesa reciella nun consuma productos de cultura basura, sicasí, igual que la obesidá afeuta más a les clases populares, porque comen más comida basura, eses clases populares son les que más consumen lo peor de la ufierta audiovisual.

Por eso nun m’inporta tantu que se fale n’asturianu na TPA como que los parámetros culturales sobre los que se faga sían cercanos y avecen a la xente a consumir productos que nun sean comida basura audiovisual. Por eso la TPA tien que dar esa uferta pública que permita a les families con más problemes económicos tener accesu a un productu de calidá gratuitamente.

Falta falar de teatru y d’otres coses, pero la idea paezme que ta clara. Falar de la oficialidá ta perbién, pero entamar a facela ta meyor.

Pepín Fernández ye inxenieru téunicu y trabaya nuna empresa de telecomunicaciones. Ye del Altu Nalón y vive en Xixón. Ye afiliáu d’EQUO Asturies y foi miembru de la Mesa de Coordinación y responsable de Comunicación. Tamién trabaya nel blogue 'Verdes y libertarias'.