Trece candidatures n'Asturies pal 20-A

IAS participa na plataforma Unidad Popular y Foro va en coalición col Partido Popular.

Éstes son les dos úniques formaciones asturianes que van acudir coles so sigles a les Estatales del 20 d'avientu, nenguna en solitariu. Izquierda Asturiana (IAS) participó nes primaries d'Ahora en Común, que finalmente va llevar el nome d'Unidad Popular, con militantes de forma individual y consiguió meter na llista a Camilo Xabel Sousa col númberu ocho. Naciu Llope, mentes va como primer suplente de la primer candidata al Senáu, Gemma Álvarez.

"Nun ye la unidá popular que queremos, pero va nesa direición. Tal como pue quedar too tres el 20-A, podría haber una reforma constitucional na qu'Asturies podría volver a quedar otra vegada relegada. Taríemos peor de lo que tamos", argumenta Faustino Zapico, secretariu xeneral d'IAS, que ve na candidatura que lidera Alberto Garzón el meyor camín p'algamar el modelu federal pola qu'apuesta la formación. "Esta plataforma respeta la identidá de les organizaciones y nós nun queremos somorguianos nunes sigles y perder el nuesu calter republicanu y asturianista", añade. Partíos como la Chunta Aragonesista y Izquierda Castellana sumáronse tamién a esta apuesta na que participa Izquierda Unida. N'Asturies, el númberu 1 de la llista de nome 'Unidad Popular: Izquierda Unida, Unidad Popular en Común, Izquierda Asturiana (IU-UPeC-IAS)' ye Manuel González Orviz.

Pela so parte, Foro, que tien un escañu nel Congresu, aceptó nesta ocasión la propuesta del PP pa dir en coalición. Asina, Isidro Martínez Oblanca va ocupar puestos de salida (númberu 2) y, nel casu de resultar escoyíu, integraráse nel grupu mestu, onde ta anguaño Enrique Álvarez Sostres. María Teresa Domínguez va nel puestu 6, Adrián Pumares como tercer suplente y Ana Isabel Méndez de Andes como cuarta. Na llista al Senáu, Foro lleva'l númberu 3 con Rosa María Domínguez de Posada, con Patricia Álvarez Díaz y Miguel Hornillos como reserves. La persona qu'encabeza la llista de Partido Popular-Foro al Congresu ye Susana López Ares.

Restu de llistes

Les once candidatures restantes n'Asturies pal 20-A, y el so respeutivu cabeza de llista, son les siguientes: PSOE, con Adriana Lastra; Ciudadanos-Partido de la Ciudadanía, con José Ignacio Prendes; Unión Progreso y Democracia, con Adán Fernández Veiguela; Partido Animalista Contra el Maltrato Animal (PACMA), con Elsa González Oslé; Escaños en Blanco, con Armando Alfonso Rodríguez Fidalgo; Partido Humanista, con José Antonio López Gómez; Partido Comunista de los Pueblos de España (PCPE), con José Iván Fernández Andrade; VOX, con Elena Figaredo; Podemos, con Sofía Fernández Castañón; Partido Unionista Estado de España, Pedro Manuel Nuño; y Recortes Cero-Grupo Verde, con María de las Mercedes de la Torre.

Compromisu por Asturies y Andecha Astur

Compromisu por Asturies, tres de la constitución de Podemos decidió sumáse a esti proyectu, polo que la organización que surdió de la confluencia de Bloque por Asturies, Unidá Nacionalista Asturiana y sectores independientes presumiblemente pidirá'l votu nestes elecciones pa les llistes de la organización que presenta n'Asturies a Sofía Castañón como cabezalera de la llista. Pela so parte Andecha Astur anunció hai unos díes que nun diba presentase a les elecciones pa "priorizar la dinámica asturiana".