Los asturianos escueyen a los sos ocho representantes nel Congresu'l 20-A

Doce son finalmente les candidatures que se presenten nel país. Les encuestes dan posibilidá de representación a PP-Foro, PSOE, Podemos, Unidad Popular (plataforma na que participa Izquierda Xunida y Izquierda Asturiana) y Ciudadanos.

La cita del domingu coles urnes ye la decimosegunda que se celebra tres la Transición. Mariano Rajoy (PP) aspira a repetir como presidente del Gobiernu estatal y presenta como númberu 1 por Asturies a Susana López Ares nuna coalición ente los populares y Foro, partíu que lleva na llista como númberu 2 a Isidro Martínez Oblanca.

El PSOE, pela so parte, presenta como cabeza de llista a Adriana Lastra, y Podemos –formación pa la que pide’l votu Compromisu por Asturies–, a la escritora Sofía Castañón. L’ex parllamentariu na Xunta Xeneral d’UPyD, Ignacio Prendes, ye’l candidatu de Ciudadanos nel país.

La quinta formación qu’algamaría representación n’Asturies según vaticinen les encuestes ye Unidad Popular, plataforma liderada por Izquierda Xunida (IX) na que participa Izquierda Asturiana (IAS). Manuel González Orviz resultó escoyíu nunes Primaries pa liderar esta iniciativa, col asturianista Camilo Xabel Sousa cono númberu 8.

Nes anteriores eleiciones, nel 2011, el PP foi’l partíu más votáu (35,41 por cientu), sumando 3 diputaos, al igual que’l PSOE (29,19 por cientu). Algamaron un representante tanto Foro (14,75 por cientu) como IX (13,27). La encuesta preeleutoral del Centru d’Investigaciones Sociolóxiques (CIS) da pal domingu 3 diputaos a PP-Foro, 2 al PSOE y 1 a Podemos, Unidad Popular y Ciudadanos.

El restu de candidatures son les siguientes: Unión Progreso y Democracia (UPyD), con Adán Fernández Veiguela; Partido Animalista Contra el Maltrato Animal (PACMA), con Elsa González Oslé; Escaños en Blanco, con Armando Alfonso Rodríguez Fidalgo; Partido Humanista, con José Antonio López Gómez; Partido Comunista de los Pueblos de España (PCPE), con José Iván Fernández Andrade; VOX, con Elena Figaredo; y Recortes Cero-Grupo Verde, con María de las Mercedes de la Torre. La candidatura del Partido Unionista Estado de España nun foi finalmente proclamada.

A nivel estatal

La campaña eleutoral que fina esta nueche tuvo marcada pola presencia de los distintos líderes en programes televisivos, dalgo novedoso en comparanza con eleiciones anteriores. La entrada de partíos nuevos que faen peligrar el bipartidismu llevó a los líderes de los dos partíos mayoritarios a utilizar esti mediu pa llegar a los indecisos como complementu de los tradicionales mítines, más enfocaos al votante convencíu.

Según la encuesta del CIS, el PP ganaría les eleiciones anque perdería la so mayoría absoluta, pasando de los 186 escaños actuales a ente 120 y 128, con un porcentaxe de votu del 28,6 por cientu. La segunda fuercia sería’l PSOE, que tamién perdería representación (de 110 a 77-89), con un 20,8 por cientu de los votos.

Los colexos eleutorales van abrir les sos puertes el domingu a les 9, mentes que la hora de zarru va ser les 20 hores, momentu nel que se procederá al recuentu de votos. Nesta xornada eleutoral tamién se van escoyer los representantes al Senáu, a esceición de los que-yos correspuenden a los Parllamentos autonómicos.