PP-Foro ganaría les eleiciones n'Asturies y el PP nel Estáu, según el CIS

L’estudiu preeleutoral del CIS da la victoria n’Asturies a la coalición PP-Foro (3 escaños), mientres que tamién tendríen representación el PSOE (2), Unidad Popular (1), Ciudadanos (1) y Podemos (1) - El PP ganaría tamién nel estáu (120-128), siguíu pol PSOE (77-89), Ciudadanos (63-66) y Podemos (45-49)

La estimación d’escaños nel Congresu pal Partido Popular (PP) ye de 120-128, con un porcentaxe de votos –tres la cocina fecha pol Centru d’Investigaciones Sociolóxiques (CIS)– del 28,6 por cientu, lloñe de la mayoría absoluta (176 diputaos) cola que cuenta na llexislatura actual al sumar 186 parllamentarios. Poro, baxaría 16 puntos con respeuto al 2011.

El partíu principal de la oposición siguiría siendo’l PSOE, que tamién perdería escaños: algamaría un 20,8 por cientu de los votos, con ente 77 y 89 diputaos. Hai cuatro años sumó 110, con un 28,76 por cientu de los votos.

L'ascensu de Ciudadanos confirmaríase al entrar nel Parllamentu con ente 63 y 66 diputaos, con un porcentaxe del 19 por cientu. Podemos y les candidatures nes que participa quedaría con un 15,7 por cientu del total y ente 45 y 49 escaños.

Unidad Popular, coalición na que participa Izquierda Xunida y Izquierda Asturiana (IAS), ente otres formaciones, quedaría nun 3,6 por cientu y con 3 o 4 diputaos, incluyíu l’asturianu Manuel González Orviz. En comparanza colos datos de la candidatura ‘Izquierda Unida-Los Verdes: Izquierda Plural’ nel 2011, perdería 4 puntos y hasta 7 escaños.

UPyD, desapaez

La entrada n’escena de Ciudadanos provocaría tamién la salidar del Congresu d’UPyD, que contaba con 5 diputaos y un 4,70 por cientu de los votos. Agora quedaría nun residual 0,7 por cientu. Tamién desapaecería’l BNG, anguaño con 2 representantes.

Completaríen l’arcu parllamentariu Convergència (9; perdería 7 tres la separación con Unió), ERC (7; ganaría 4), EH Bildu (7; caltendría los 7 d’Amaiur), PNV (5; perdería 1 contando col de Geroa Bai) y Coalición Canaria (1; perdería 1). Mentes, Foro mantendría’l so diputáu dientro de la coalición PP-Foro n’Asturies, onde Isidro Martínez Oblanca ocupa’l númberu 2 de la llista –la encuesta da 3 a la candidatura–, pasando a ocupar parte del Grupu Mestu.

El casu de Podemos

Hai que destacar que Podemos preséntase en dellos territorios en coalición con otres formaciones. Asina de los ente 45 y 49 diputaos que ganaría según l’estudiu del CIS, 23-25 son propios y 10-11 corresponderíen a ‘En Comú Podem’ en Catalunya (Barcelona en Comú, ICV y EUiA), 7 a ‘Compromís-Podemos. És el moment’ na Comunitat Valenciana) y 5-6 a ‘En Marea’ (Anova y Esquerda Unida). Mentes, el Partido Popular tamién va en coalición col PAR n’Aragón y con UPN en Navarra.

Otra manera, esti vienres entama la campaña eleutoral, que va allargase hasta’l día 18 d’avientu. La cita coles urnes ye’l 20, tres una xornada de reflexón.