El Gobiernu firma un conveniu con cuatro portales de viaxes

Atrápalo, Rumbo, Viajar y Muchoviaje van collaborar cola promoción d’Asturies nes sos web tres la firma de un conveniu col Gobiernu. Esti alcuerdu forma parte d’una estratexa global de comercialización turística n'Internet.
 
Los oxetivos principales d'estos convenios son elevar el númberu de turistes que lleguen al país y potenciar el conocimientu de la marca Asturies y de la so campaña 'Asturias lo dice todo el mundo'. Al mesmu tiempu, el Gobiernu quier meyorar la presencia d’Asturies en redes sociales y blogues. Según apuntó José Luis Vega, xerente de la Sociedad Regional de Turismo, el 70 por cientu de los visitantes nel 2010 informáronse na web sobre Asturies enantes de facer el viaxe y ún de cada cuatro fixo la reserva per Internet.
 
Esta apuesta del Gobiernu asturianu pola rede pa promocionase turísticamente va completase cola puesta en marcha de la páxina www.asturiaslodicetodoelmundo.com. El saltu a la rede de la campaña incorpora too tipu de ferramientes d'espardimientu on-line: una web oficial abierta a la participación de 'tol mundu', blogues especializaos en naturaleza, cultura, gastronomía y negocios y congresos, redes sociales y foros.