García Pañeda nuevu direutor del Área I+D+I de la Universidá d’Uviéu

Xabiel García Pañeda, persona comprometida col idioma y estudiosu de la so presencia nes nueves tecnoloxíes, vien de ser nomáu direutor del Área d'I+D+I de la Universidá d'Uviéu.

El nomamientu de Pañeda vien depués de la salida del catedráticu del área de Tecnoloxía Electrónica Manuel Rico Secades, que vuelve a la docencia. A partir d’agora, esta estaya dependiende del Vicerrectoráu d’Investigación que dirixe Santiago García Granda, tará baxu'l mandu d'esti profesor interín del Area d’Inxenería Telemática y direutor del Observatoriu Tecnolóxicu de HP (Hewlett Packard), con sede nel campus de Xixón dende fai unos meses.

Xabiel García Pañeda entró como profesor nel Área d’Inxeniería Telemática en 2000 y cuatro años más tarde presentó la so tesis doctoral sobre servicios d’audeu/videu n’Internet. Esi mesmu añu entra a formar parte del comité SYMM (Synchronize Multimedia) del WWC (Woed Wide Web Consortio) convitiéndose nel primer español en tar en dalgún de los comités d’esti consorciu internacional

Pañeda tien espublizaos unos cincuenta artículos n'Asturies.com y n’El Comercio, amás ye coautor xuntu Rubén Sánchez Antuña de ‘Dos visiones asturianes de les nueves tecnoloxíes’, espublizáu por Araz Llibros.

Esti uvieín residente en Xixón tien una montonera de publicaciones científiques y collaboró ente otros nel llibru ‘La ciencia n'otres palabres’. Sobre l’asturianu  tien artículos en 'Lletres Asturianes' y trabayó na Comisión que fixo'l cartafueyu " Terminoloxía d'Internet y d'interfaces pa programes informáticos en Llingua Asturiana".

N’agostu d’esti añu, Pañeda va ser un de los profesores de la Universidá Asturiana de Branu (UABRA), concretamente nel cursu  ‘Internet y asturianu: aplicaciones socio-educatives’, que quier averar al profesoráu d’asturianu a los recursos qu’ufre la rede pal deprendizax oral y escritu del idioma del país.