Top 100 DALLA online

|

Magar, per, camentar, amosar y anguaño son les cinco pallabres más buscaes nel DALLA online, según afita un estudiu espublizáu nel últimu númberu de ‘Lletres Asturianes’.

‘Estudiu sobro l’emplegu del DALLA online. Un averamientu sociollingüísticu’ ye un trabayu de los profesores universitarios Xosé Antón González Riaño, Xabiel García Pañeda y David Melendi Palacio, qu’estudiaron les 154.725 consultes de 7.063 usuarios feches al DALLA online en 108 díes, ente febreru y mayu de 2009. L’estudiu ta espublizáu nel númberu 102 de ‘Lletres Asturianes’, el boletín oficial de l’Academia de la Llingua.
 
Nel documentu podemos ver les 100 pallabres más buscaes dende la páxina web de la institución, que van dende la más visitada, la conxunción ‘magar’ con 105 apaiciones, hasta la númberu cien, día con 42. Otres como camentar, amosar, anguaño, entamar o sele son tamién enforma populares.
 
Según los autores, l’espardimientu y utilización del DALLA on-line tien algamao unos cumales más qu’aceutables, con 1.400 consultes y más de 65 usuarios por día. Teniendo la metá de les consultes como oxetivu pallabres qu’apaecen conseñaes nel diccionariu, mientres que les busques suxeríes pol diccionariu son siguíes nel 83% de los casos. Namás nel 5% d’ocasiones, los usuarios nun alcuentren una solución asemeyada o busquen pallabres que nun tán nel DALLA.
 
Los autores concluyen que les pallabres más buscaes son los verbos, siguíos por alverbios, sustantivos, preposiciones, axetivos ya interxeiciones, polo que concluyen que, a la contra de los que podía camentase, nun son los nomes de les coses los qu’espierten más interés, sinón les aiciones y especificaciones d’estes. Los usuarios avecen buscar pallabres asturianes d’usu non mui espardíu, pallabres que coinciden cola forma castellana y pallabres asturianes de calter dialeutal o con una ortografía non mui afitada.
 
L’estudió afirma que l’averamientu al emplegu de la ferramienta online reflexa la situación sociollingüística del asturianu, “hai persones que tienen interés pol asturianu, pero desconocen espresiones básiques del so léxicu como magar, camentar, entamar o sele”. Lo qu’indica que les pallabres más buscaes “dan cuenta de la perda social d’unes espresiones bien afitaes hasta apocayá”.
 
Los usuarios busquen tamién unidaes léxiques cencielles y que coinciden col castellán, como pero, hasta, por ser… Pa los responsables del estudiu, esto tien l’envís de comprobar qu’eses pallabres son normatives n’asturianu. Mientres que n’otros casos, búsquense pallabres cencielles anque dafechamente asturianes, como facer bonu, tou o nun, lo que pa lo autores indica una busca de que son pallabres normatives dientro del asturianu estándar, yá que nun entamu son percibíes como dialeutalismos.
 
Nel estudiu tamién se comprueba qu’a vegaes hai enquivocos por buscar una pallabra incorreuta ortográficamente o nun normativa, como asgaya, muy, cellebrar, anguañu o collor. Tamién intenten buscar pallabres con espresión formar castellana que nun forma parte del léxicu asturianu: bueno, hoy, noche…
 
El trabayu quier conocer l’aplicación que los usuarios faen del DALLA online dende una perspeutiva cuantitativo-descriptiva y analizar ya interpretar les condiciones, carauterístiques y situaciones nes que se dan les busques, plantegando a lo cabero, les implicaciones sociollingüístiques y socioeducatives.
 
La versión online del Diccionariu de la Llingua Asturiana espublizóse en marzu de 2008 al traviés de la páxina web de l’Academia. El diccionariu impresu presentóse, depués d’una década de trabayu, el 13 d’avientu de 2000 na Xunta Xeneral del Principáu, coincidiendo colos venti años de creación de la institución llingüística.

Contador Estadistiques