Día del Llibru Asturianu

L-R entama la campaña de financiación del so segundu discu tres presentar l’adelantu ‘Mirada moyada’

|
L-R

El periodu de confinamientu foi aprovecháu por Leticia González 'Baselgas' y Rubén Bada, L-R, pa desendolcar la so faceta creativa. Asina nació ‘Mirada moyada’ y el restu de cantares del que va ser el so segundu discu, ‘N.O.S.’, que cuenta con una campaña de micromecenalgu na rede entamada pol dúu pa la so financiación.

Dos años depués del so primer trabayu, que foi un revelación dientro la escena asturiana baxo’l nome y etiqueta ‘Post-folk asturianu’, L-R yá trabaya nel so socesor, con pieces nacíes nos meses de confinamientu que siguen les dinámicas de la tradición oral, con melodíes y lletres basadas nes vivencies propies de los dos artistes. “Foi la esperiencia total”, rellaten, nel que “nació una cosa importantísima que yá taba dientro de nosotros dende va muchu tiempu: el proyeutu N.O.S.”

El cantar ‘Mirada moyada’ sirvió como entremés de lo que nos espera nesti segundu discu autoeditáu nel que’l grupu pretende dar rienda suelta al so mou particular d’entender la música tradicional asturiana. Esto ye, “dende una perspeutiva actual y próxima a les creaciones más contemporanees. Queremos siguir disfrutando de la música tradicional y, d’igual manera, fomentar maneres nueves d’integrar na sociedá les músiques de raigañu”, apunta’l dúu.

En definitiva, “entender y difundir la música tradicional asturiana como dalgo vivo y en tresformación constante; un bien común qu’evoluciona colos tiempos y les tendencies”.

2.500 euros

Pa financiar ‘N.O.S’, L-R ta acabante d’abrir una campaña de micromecenalgu na rede al traviés de la plataforma Verkami. El presupuestu pa grabar, producir y editar l’álbum, amás de pa costiar les recompensese, ye de 2.500 euros, de los que lleven yá recaudaos en dos díes 706, esto ye, el 28 por cientu.

Entes les posibilidaes d’esta cuestación popular ta la posibilidá de mercar una descarga dixital por 5 euros o de facese col discu físicu por 7 xunto con una chapa y una pegatina, o un conciertu priváu dientro del territoriu estatal por 1.000 euros amás de recibir el trabayu y dellos complementos. Pentemedies, entraes pa la “micropresentación” en Baselgas con “miniespicha” incluyida o facese con un pack qu’inclúi una mázcara y un bolsu col logu del dúu.

Contador Estadistiques