Xuben los contaxos, con 164 casos de COVID-19 detectaos esti xueves

La tasa de positividá diaria asitióse nun 7,10 por cientu. Yá son cuatro los casos confirmaos de la variante brasileña del coronavirus SARS-CoV-2.

A falta de la espublización de los datos oficiales de la COVID-19, la Conseyería de Salú informó de 164 contaxos ayeri. Ye la cantidá más alta dende'l 1 de marzu, cuando se comunicaron 165 anque la revisión de cifres baxóla a 163 –más atrás, habría que llegar al 18 de febreru, cuando tán rexistraos 189 positivos–.

La selmana principió cola cifra más baxa del añu, el domingu con 61, col restu de díes al rodiu de los 120 positivos. Hai que ver si'l datu de güei ye ruíu o si se vien confirmando una tendencia ascendente; nesi sen, la incidencia acumulada a 14 díes de les últimes xornaes llegó'l domingu al puntu más baxu del descensu de la tercer fola, con 157, pa xubir el miércoles hasta los 161 –cola actualización aumentó ayeri hasta 163–.

El Serviciu de Salú del Principáu d'Asturies (SESPA) fixo 2.988 pruebes de diagnósticu d'infeición activa, polo que la tasa de positividá asitióse nel 7,10 por cientu, superando ampliamente'l 4,88 por cientu de la xornada previa. A 7 díes, el miércoles esti porcentaxe yera del 5,16 por cientu –aumentó ayeri al 5,29 por cientu–.

Un home de 72 años perdió la vida cola enfermedá causada pol coronavirus SARS-CoV-2. Dende qu'entamó l'andanciu finaron un total de 1.880 persones.

Hai hospitalizaos 186 pacientes con confirmación o sospecha de COVID-19, a los qu'hai sumar 75 que tán na UCI. Son 3 y 2 menos que'l miércoles, de manera respeutiva.

Dos grupos familiares

Melania Álvarez García, vocera del Executivu, confirmó esta mañana que'l númberu de casos confirmaos de la variante brasileña yá xube a 4. Pertenecen a dos grupos familiares diferentes y tolos sos contautos estrechos tán en cuarentena.

Activaes les restricciones de Selmana Santa

Güei activáronse les restricciones mínimes pautaes poles autonomíes y el Ministeriu de Sanidá, que van tar vixentes hasta'l 9 d'abril. Nel casu d'Asturies nun supón munchu cambiu, cola especial novedá de la prohibición d'axuntamiento de non convivientes n'espacios privaos zarraos; en público sí pueden quedar hasta 4 y en zones abiertes, hasta 6.