119 contaxos diarios de media la selmana pasada

|
Sama Casa Conceyu

L'anterior rexistráronse 113. Llangréu entra per primer vegada en riesgu estremu, lo que lleva a un zarru perimetral dende'l miércoles.

La evolución de la pandemia n'Asturies sigue en meseta. La selmana pasada tornaron a xubir de manera leve los contaxos depués d'entrar a ella colos númberos más baxos del 2021, 61 contaxos el domingu 21.

La media de positivos nos 7 díes últimos foi de 119 al pasar de 46.155 a 49.985 casos confirmaos con pruebes de diagnósticu d'infeición activa, anque una revisión de los datos oficiales provocó que'l total de casos detectaos na pandemia fixera rebaxar esta cantidá global a 46.954 por duplicaos en feches anteriores. Les dos selmanes anteriores esta cantidá quedó en 113, nun momentu de picos na curva.

Asina, la evolución d'esti datu na tercer fola foi la siguiente: 78, 101, 167, 292, 421, 482, 383, 226, 154, 135, 144, 113, 113 y los actuales 119. La entrada de la variante inglesa del coronavirus SARS-CoV-2, muncho más contaxosa, que yá supón un 97 por cientu de los casos, esplica esta situación.

No que respeuta a la fin de selmana, detectáronse 315 positivos polos 266 de l'anterior. El vienres foi la peor xornada, con 114, mentes que'l sábadu hebo 90 y ayeri, 111.

La tasa de positividá a 7 díes asitióse'l sábadu nel 5,07 por cientu –ayeri xubió al 5,13 por cientu–, lo que supón un descensu respeuto al xueves, cuando quedó nel 5,29 por cientu. Estos díes el porcentaxe diariu foi del 4,73 por cientu, del 4,41 por cientu y del 5,10 por cientu, de manera respeutiva.

9 finaos

Nes trés xornaes últimes hebo que llamentar la muerte de 9 persones, ente elles una sanitaria de 50 años ayeri. El vienres y el sábadu finaron 4 cada día, cinco muyeres y trés homes.

Dende qu'entamó l'andanciu morrieron cola enfermedá causada pol coronavirus SARS-CoV-2 1.891 asturianes y asturianos –l'actualización suma 2 más de díes previos non contabilizaos–. Mentes, hai nestos momentos hospitalizaos 184 pacientes con confirmación o sospecha de COVID-19, a los qu'hai que sumar 70 personas que tán na UCI, lo que son 2 y 5 menos que'l xueves, de manera respeutiva.

Dos conceyos en nivel 4+

Llangréu va activar el zarru perimetral y les midíes del nivel d'alerta 4+, como'l pieslle de los interiores de los chigres, al entrar en riesgu estremu. El conceyu de la cuenca d'El Nalón sobrepasa la llende afitada pola Conseyería de Salú, al cumplir el requisitu de llevar polo menos 3 díes nel nivel 4 según el baremu del Ministeriu de Sanidá y rexistrar una incidencia acumulada a 14 díes de 356 casos cada 100.000 habitantes (el máximu posible son 325), de 537 ente mayores de 65 años (195) y una trazabilidá del 65,39 por cientu (ha ser superior al 75 por cientu).

D'esta forma súmase a Siero, na selmana última l'únicu coles mayores restricciones, qu'en Llangréu va entrar a valir el miércoles per 14 díes. Pa consultar los indicadores de tolos conceyos y les midíes vixentes en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

Na semeya, Sama, cola Casa Conceyu al fondu.

 

Contador Estadistiques