Asturies, que rexistra’l so primer casu de variante brasileña de coronavirus SARS-CoV-2, activa esti vienres les restricciones de Selmana Santa

El vienres actívense n’Asturies les restricciones pa Selmana Santa, cola principal diferencia coles actuales na imposibilidá d’axuntase en domicilios persones non convivientes. Esti periodu coincide cola detección del primer casu de variante brasileña del coronavirus SARS-CoV-2 nel país que, al igual que la inglesa, tien una alta tresmisión.

Asturies, que va siguir zarrada hasta’l 9 de mayu, va entrar, con una incidencia acumulada de 159 casos por cada 100.000 habitantes nos 14 díes últimos –datos del martes–, esta medianueche nel periodu de midíes pa contener la propagación d’infeiciones causaes por SARS-CoV-2 nestes xornaes festives pa una parte grande de la población. Éstes van allargase hasta’l 9 d’abril.

El cambiu principal coles restricciones actuales ye la prohibición de xuntes ente non convivientes n’interiores n’espacios privaos, como ye’l casu de domicilios. N’espacios públicos abiertos la llende va tar en 6 persones non convivientes, mentes qu’en llugares zarraos, como hostelería, va ser de 4.

Dos más n’estudiu

El Llaboratoriu de Viroloxía del Hospital Central d’Asturies (HUCA) detectó ayeri’l primer casu n’Asturies de la variante brasileña del coronavirus SARS-CoV-2, importáu de Sudamérica. Amás, tán n’estudiu otros dos positivos.

La brasileña, al igual que pasa cola inglesa, mayoritaria anguaño nel país al protagonizar un 97 por cientu de los caso, ye más contaxosa que la china, primera en llegar a Asturies, y más agresiva al provocar reinfeiciones. Tien el so orixe detectáu en Manaos, nel Brasil amazónicu, y ta espardiéndose rápidamente per toda Sudamérica, con presencia n’Europa (Alemaña) dende xineru y nel Estáu (Comunidad de Madrid), dende entamos de febreru.