108 contaxos esti miércoles con una tasa de positividá diaria del 4,88

Hai que llamentar 2 muertes na xornada. Reactivóse la vacunación con AstraZeneca colos mayores de 55 años de servicios esenciales en cuatro puntos del país.

A falta de la espublización de los datos oficiales de la COVID-19, la Conseyería de Salú comunicó 108 contaxos ayeri –finalmente son 9 más, hasta 117, por casos non contabilizaos en xornaes previes–. Son 10 menos que'l martes, cuando se deteutaron 118 –l'actualización rebaxólos a 117 por un duplicáu de díes anteriores–, anque la tasa de positividá ye un poco mayor: 4,88 por cientu, al facese 3.217 pruebes de diagnósticu d'infeición activa, por 4,84 del día anterior, cuando se realizaron 3.410.

A 7 díes, el martes esti porcentaxe taba nun 5,21 por cientu –ayeri baxó al 5,16 por cientu–. La tendendencia ye nestos díes de descensu leve.

Dos homes de 92 y 85 años perdieron la vida cola enfermedá causada pol coronavirus SARS-CoV-2. Dende qu'entamó l'andanciu finaron un total de 1.879 persones.

Aumentaros los paciente d'UCI ayeri, al pasar de 73 a 77. Mentes, los ingresaos con confirmación o sospecha de COVID-19 yeren 189, 6 menos que'l martes.

Otra manera, ayeri reactivóse finalmente la vacunación con AstraZeneca depués del parón de más d'una selmana hasta conocer la valoración del Comité de Farmacovixilancia de l’Axencia Europea del Medicamentu tres dellos casos inusuales de trombosis venosa cerebral nel continente que se pensaba que podríen tar venceyaos col preparáu d'Oxford. De tarde sanitarios, docentes y personal de les fuercies y cuerpos de seguridá del grupu d'edá 55-66 citaos pol Serviciu de Salú del Principáu d'Asturies (SESPA) acudieron a recibir la so primer dosis nel centru de salú de Contrueces (Xixón), nel Autovac del HUCA (Uviéu), l'Hospital San Agustín (Avilés) y nel del Oriente (Les Arriondes).

40 biltos activos

Asturies informó al Ministeriu de Sanidá de la esistencia de 40 biltos activos, 9 más qu'hai una selmana, con un total de 398 casos. 16 d'ellos detectáronse estos 7 díes últimos, comunica la conseyería.