Un llibru fai alcordanza de los fusilamientos de Valdediós

La conceyala d'Educación de Xixón Carmen Rúa presentó ayeri'l llibru 'La fosa de Valdediós', que reproduz la historia del rescate de los cuerpos de los 17 trabayadores del hospital siquiátricu de La Cadellada executaos poles brigaes navarres del exércitu franquista'l 28 d'ochobre del 1937, en Valdediós (Villaviciosa), nel trescursu de la Guerra Civil.

Los autores del llibru, Pedro de la Rubia Huete y el so fíu Angel de la Rubia Barbón, comentaron que que la investigación entamóse nel 2001 y que'l llibru "rescata la memoria de los fallecíos, que se desenterraron nel añu 2003". De los calabres de los 11 homes y 6 muyeres que s'alcontraron namás pudieron identificase 5

La obra presenta dello d'información forense y tamién una copia de la grabación de la conversación ente la viuda d'un de los fallecíos, Esther Montoto, y la so fía, Emilia Rico, esplicándo-y los socesos de Valdediós. Les informaciones y imáxenes inxertos nel llibru provienen d'archivos, d'Asturies y d'otros llugares. La edición d'esti llibru sobre los fusilamientos de Valdediós corrió al cargu del Muséu del Pueblu d'Asturies de Xixón, contando con un prólogu escritu pol doctor n'Historia pola Universidá d'Uviéu y director del Institutu d'Enseñanza Secundaria de Navia, Ramón García Piñeiro.