¿Quién yera Ramiro I?: el rei asturianu ‘ilexítimu’ que tornó a los viquingos y quemó a los magos

El monarca asturianu ta agora d’actualidá pol descubrimientu d’un llábana en Santa María del Naranco que fai pensar a los espertos que concibiera la construcción pa ser la so tumba. Ésta foi la so vida.

¿Cuándo naz?

Alredor del añu 790, cuando reinaba’l so padre Bermudo I (789-791) o Alfonso II (791-842), el so predecesor y primu segundu.

¿Cómo llega al tronu?

Alfonso II fina ensin descendencia y según la versión más espardida que se tresmitió históricamente, escuéyelu como socesor. Nel momentu de la muerte, Ramiro taba fuera d’Asturies, na Bardulia, territorios que llueu llamaríense Castiella, pa casase con Paterna, lo qu’aprovechó Nepociano, conde palatinu y cuñáu d’Alfonso II, pa tratar de xubir al tronu.

Sicasí, otres versiones y cróniques consideren que Nepociano yera'l llexítimu socesor y que Ramiro I foi un usurpador.

¿Qué asocedió finalmente?

Ramiro formó exércitu en Lugo cola intención de dir a Uviéu a reclamar el reinu. Llegó hasta’l Narcea, con un alcuentru al altor de Corniana que-y permitió acceder al tronu al quedar Nepociano abandonáu polos sos homes y ser ésti capturáu depués nel oriente y castigáu con ceguera y apresamientu nun monesteriu.

¿Tuvo un reináu tranquilu?

Non, magar durar dalgo más de 7 años hasta’l 850, y que'l frente musulmán nun-y dio problemes, tuvo dos rebeliones internes comandaes por condes y tamién ataques viquingos.

¿Cuándo foron esos ataques viquingos?

La ‘Crónica Albeldense’ rellata que la primer venida de navegantes viquingos a Asturies foi nel añu 844, refiriéndose a ellos como normandos. Tratábase d’una de les espediciones que solíen facer pel branu. Les cróniques ‘Rotense’ y ‘Sebastián’ cuenten el so percorríu pela mariña, l’arribada a Xixón o la derrota col exércitu asturianu, anque la primer fonte que trata estos fechos son los ‘Anales de San Bertín’.

Depués del ataque a Xixón, intentaríenlo na actual A Coruña, territoriu naquel tiempu perteneciente al Reinu d’Asturies. La espedición viquinga siguiría un trayeutu hacia’l sur con ataques a Lisboa, Cádiz o Sevilla.

¿Tuvo enfrentamientos colos musulmanes?

La presencia viquinga y otros conflictos internos provocó que nun hubiera muncha actividá bélica contra los territorios asturianos por parte d’Abderramán II. Sicasí, les cróniques asturlleoneses y mores falen de campañes entamaes por entrambes partes na zona d’Araba y La Rioja.

Testimonios de sieglos posteriores asitien nesti tiempu la lleenda de la nomada ‘batalla de Clavijo’, na que supuestamente l’apostol Santiago apaecióse en suaños a Ramiro I, asegurándo-y la victoria.

¿Por qué se lu conoz como ‘Uirga iustitiae’?

La ‘Crónica Albedense’ refierse a Ramiro I como ‘Uirga iustitiae’, que vien a significiar vara de xusticia. Esta definición dase pola so severidá contra lladrones, rebeldes o magos.

¿Magos?

Seríen les persones que siguíen faciendo cultos paganos. Ramiro I llegaría a quemalos na foguera.

¿Qué aportó al arte asturianu?

Ún de los principales aspeutos del reináu de Ramiro I foi la so aportanción al arte asturianu, hasta’l puntu d’afitar un estilu, el ramirense. Na so etapa como monarca llevantóse Santa María del Naranco, Samiguel de Lliño y Santa Cristina de Ḷḷena.

¿Con qué oxetivu construyó Santa María del Naranco?

L’últimu descubrimientu fechu nunes obres de conservación del monumentu prerrománicu, l’afayu d’una llábana que podría pertenecer al sarcófagu del monarca asturianu, lleva a los espertos a pensar que Ramiro I concibióla realmente como tumba.

¿Cuándo muerre?

Fina nel añu 850, socediéndolu’l so fíu Ordoño I, que tuvo cola so primer muyer, Urraca. Esistía la creencia de que los sos restos recibieron sepultura nesi momentu nel panteón de reis de la Nuesa Señora del Rei Casto xunto a la segunda muyer, Paterna. Güei descansen nel nuevu panteón de reis de la catedral d’Uviéu.

Na imaxe, cuadru de Ramiro I (recortáu) obra d'Isidoro Lozano.