Tornen les mázcares obligatories nel esterior y solicítase'l pidimientu del pasaporte COVID-19

|
Conferencia de Presidentes telemática Juan Cofiño

Estes midíes tómense coincidiendo col día con más contaxos de tol andanciu.

Pedro Sánchez comunicó na Conferencia de Presidentes telemática d'esta tarde, na que'l vicepresidente Juan Cofiño sustituyó a Adrián Barbón, enfermu de COVID-19 y aislláu nel apartamentu de Presidencia, la decisión de decretar la vuelta del usu obligatoriu de la mázcara, desaniciáu'l 26 de xunu. Mañana va aprobase esta midida nun Conseyu de Ministros estraordinariu.

Pela mañana, el Conseyu de Gobiernu aprobaba la solicitú al Tribunal Superior de Xusticia d'Asturies (TSXA) del requerimientu del pasaporte COVID-19 p'acceder a discoteques y llocales d'ociu nocherniegu, establecimientos de xuegu y apuestes, hostelería, ximnasios, visites a centros sociosanitarios, eventos multitudinarios o instalaciones deportives o de cultura nes que se permita'l consumu de bébores y comida. La midida tendría valir per un periodu d'un mes y la obligatoriedá esixiríase a los mayores de 12 años.

Les dos decisiones lleguen nel día nel que se conoció qu'ayeri foi la xornada con más contaxos de tol andanciu, un total de 870. Supérense asina los 808 del 13 de payares del 2020, techu hasta'l momentu.

3 finaos

Nesti día hebo que llamentar la muerte de 3 persones: una muyer de 87 años y dos home de 85 y 81 años. El total de finaos nel andanciu xube poro a 2.136.

217 pacientes tán ingresaos con confirmación o sospecha de COVID-19, 2 menos qu'ayeri. En planta pasaron de 173 a 169, mentes que na UCI aumentaron de 46 a 48.

60 biltos activos

Na selmana del 13 al 19 d'avientu comunicáronse 20 biltos nuevos, polo que nesi momentu había 60 focos activos con un total de 601 casos. Son 7 brotos más que la selmana anterior.

Na imaxe, el Cofiño participa na Conferencia de Presidentes telemática d'esta tarde. Semeya obra d'Armando Álvarez.

 

 

 

Contador Estadistiques