La quinta fola yá rexistra la media de contaxos diarios nuna selmana más alta de tol andanciu

Hebo 632 casos la pasada, superando los 508 de metanes de payares del 2020.

Les cifres de la pandemia de COVID-19 siguen n'ascensu nesta quinta fola, superando tolos rexistros anteriores. La selmana pasada detectáronse 4.424 positivos, polos 2.988 de l'anterior, y namái nos trés díes de la fin de selmana comunicáronse 1.814: 731 el vienres, 618 el sábadu y 465 el domingu.

Entamóse la mesma con 79.008 y el total del andaciu llegaba a 83.432. Son 632 casos diarios, la cantidá más alta dende la llegada del coronavirus SARS-CoV-2.

Hasta la fecha'l récor yeren los 508 de la selmana del 9 al 15 de payares del 2020. Dende qu'Asturies.com vien rexistrando esti datu, a lo último d'agostu del 2020, ésti evolucionó asina: 39, 46, 52, 83, 92, 92, 150, 210, 272, 334, 408, 508, 344, 252, 194, 125, 101, 78, 101, 167, 292, 421, 482, 383, 226, 154, 135, 144, 113, 113, 119, 115, 121, 126, 115, 84, 52, 49, 53, 51, 50, 55, 51, 57, 196, 448, 493, 423, 289, 194, 133, 77, 60, 42, 20, 12, 13, 11, 13, 17, 22, 32, 29, 70, 175, 322 y 427, hasta los 632 actuales.

Ataque informáticu

Los problemes provocaos pol ataque informáticu al sistema sanitariu asturianu del sábadu provocó un retrasu de la comunicación de los datos de la COVID-19, conociéndose güei la de los últimos 4 díes. Asina, a los 1.814 contaxos de la fin de selmana hai qu'añadir los 664 d'ayeri.

Les hospitalizaciones tamién aumentaros dende'l xueves, pasando de 187 a 219. D'ellos 173 tán en planta, 28 más, y 46 na UCI, 4 más.

Nestes xornaes hebo que llamentar 7 muertes: una muyer de 89 años y un home de 57, el vienres; una muyer de 93, el sábadu; dos homes de 90 y 87, el domingu; y otros dos de 93 y 58, ayeri. No que va d'andanciu'l númberu de finaos xube a 2.133.

Na semeya, vacunación a neñu n'Avilés la selmana pasada.