El xueves la mázcara va dexar de ser obligatoria n'espacios d'esterior

11 finaos nuna xornada na qu'aumentaron los contaxos y baxó'l númberu d'hospitalizaos.

"El martes próximu llevaremos al Conseyu de Ministros el Real Decretu en virtú del que s'elimina la obligatoriedá de les mázcares nel esterior", confirmaba esta mañana Carolina Darias, ministra de Sanidá. El miércoles esti asuntu aldericóse nel Conseyu Interterritorial del Sistema Nacional de Salú, onde se decidió aplazar polo menos una semana la so retirada, siempre basándose na opinión de los espertos de Salú Pública.

Dos díes depués llega esta anuncia, que se va llevar treslledar el llunes a les autonomíes nun axuntamientu nuevu del Conseyu Interterritorial. La planificación ye que s'apruebe'l martes pa que'l miércoles s'espublice nel BOE y el xueves entre valir el Real Decretu qu'anula la obligatoridá de llevar mázcara nel esterior que s'activó'l 24 d'avientu.

401 contaxos más que'l miércoles

La Conseyería de Salú detectó 1.538 casos nuevos de COVID-19 ayeri, 401 más que'l miércoles, cuando se comunicaron 1.137 –l'actualización de datos oficiales aumentó'l total a 1.205–. Esta medra llega depués de dos xornaes de baxada de positivos.

Nesti día hebo que llamentar 11 muertes: 10 muyeres de 98, 88, 88, 87, 87, 83, 72, 60 y 53 años y 1 home de 93. No que va d'andanciu finaron cola enfermedá causada pol coronavirus SARS-CoV-2 un total de 2.340 persones –l'actualización sumó a la serie una perda humana más non contabilizada nos díes previos–.

Hai 381 pacientes ingresaos con confirmación o sospecha de COVID-19, polos 425 díes del miércoles. D'ellos 347 tán planta y 34 na UCI, 41 y 3 menos, de manera respeutiva.