Supérense los 700 casos nuevos de COVID-19

Asturies pasa a tar en nivel d'alerta altu. Sanidá da'l preste a la tercer dosis pa mayores de 40 años y a vacunaos con AstraZeneca.

La Conseyería de Salú comunicó la detección ayeri de 727 casos nuevos de COVID-19, la mayor cantidá de la quinta fola y de tol 2021, superando los 663 del martes. Aumenten tamién les hospitalizaciones, pasando de 189 a 191.

149 tán en planta, 2 menos que'l martes, y 42 n'UCI, 4 más. La ocupación total por coronavirus SARS-CoV-2 ye del 5,5 y del 14,14 por cientu, de manera respeutiva.

Con estos datos Asturies pasa de nivel d'alerta 2 a 3, de 4, esto ye, altu. Na xornada tamién hebo que llamentar la perda de dos homes de 86 y 70 años y una muyer de 86, muertes que faen aumentar el total del andanciu a 2.122.

Yá colos de 59 años

Güei entamóse n'Asturies cola vacunación de refuerciu a les persones nacíes nel 1962, que yá tán siendo citaes en toles árees sanitaries. La Comisión de Salú Pública, na que tán les autonomíes y el Ministeriu de Sanidá, autorizó esta mañana la so alministración a mayores de 40 años, a los seis meses de la segunda dosis, y a los vacunaos con AstraZeneca a partir de los trés meses.

Na semeya, un ciudadanu de 59 años recibe la dosis de refuerciu en Llangréu.