Ómicron yá ta n’Asturies: confirmaos 9 casos

De los casos sospechosos que se taben estudiando nel país confirmáronse 9 como de la variante ómicron del coronavirus SARS-CoV-2, más contaxosa que la delta. El conseyeru de Salú, Pablo Ignacio Fernández Muñiz, nun descarta la recomendación de más restricciones “si la situación sigue empeorando”.

Ómicron, que ta nel focu de tolos espertos pa conocer el so algame real, yá ta n’Asturies. La Conseyería de Salú informó de la detección de 9 casos d’esta variante que provoca más tresmisión, pero que, de momento, recordó’l so responsable, nun provocó nengún casu grave ente los detectaos na Xunión Europea.

Sobre la incidencia alta que ta teniendo’l país, que’l martes rexistró la mayor cantidá de contaxos del tol añu, 663, indicó que “Asturies ta nel nivel d’alerta mediu, 2 sobre 4, y tamos plantegándonos la posible necesidá de dar un pasu más nes actuales midíes non farmacolóxiques si la situación sigue empeorando”. Na actualización última a 14 díes yera de 579,42 casos cada 100.000 habitantes.

Na semeya, Fernández Muñiz y Lidia Clara Rodríguez, direutora xeneral de Política y Planificación Sanitaries, ayeri nun momentu del Conseyu Interterritorial del Sistema Nacional de Salud.