L'entamu de la vacunación a la reciella coincide col récor de contaxos del 2021

Dende payares del 2020 nun se rexistraba una cifra tan alta de casos de COVID-19.

Na xornada d'ayeri algamóse'l récor de contaxos del añu, con 663 positivos detectaos. Hasta'l momentu'l peor día yera'l 16 de xunetu, na cuarta fola, con 627 contaxos.

Ye la cantidá más alta dende'l 13 de payares, mayor marca de la pandemia, cuando quedaron rexistraos 808 casos. Esta cifra llega precisamente'l día nel que s'entama la vacunación a menores de 5 a 11 años col preparáu pediátricu de 'Comirnaty' de Pfizer/BioNTech, que finalmente nun se va facer nos centros de salú, sacante nel occidente dende'l vienres, sinón en dellos espacios habilitaos, como'l Palaciu de Deportes en Xixón, l'AutoVac del Hospital Monte Naranco n'Uviéu, el San Agustín d'Avilés, el Valle del Nalón de Riañu, el Vital Álvarez Buylla de Mieres y el Llar del Xubiláu de Cangues d'Onís y les naves ñeru del polígonu industrial de L'Aguadamía en Ribeseya, siempre con cita previa.

Mentes, nel área sanitaria II, con cabecera en Cangas del Narcea, la reciella va recibir les dos dosis nel Hospital Carmen y Severo Ochoa, cola esceición de les neñes y neños d'Ibias, Degaña, Allande y Tinéu, que van facelo en centros de salú.

4 finaos

Hai que llamentar la muerte de cuatro persones, qu'aumenten el total de finaos del andanciu a 2.119. Mentes, siguen aumentando les hospitalizaciones, pasando de 186 a 189, de los que 151 tán en planta, 4 más, y 38 na UCI, 1 menos.

Na semeya, caxes colos viales de les vacunes pediátriques 'Comirnaty' de Pfizer a la so llegada'l llunes a Asturies.