Skama la Rede graba cuatro cantares “nos qu’evolucionamos nel nuesu soníu” y prepara’l so primer videoclip

|
Skama la Rede

“Siguimos nel mesmu estilu, pero evolucionamos nel nuesu soníu como yá asocedió con ‘Avante’”, avanza Miguel Fernandi ‘Burilo’, cantante de Skama la Rede. El grupu ta acabante de grabar cuatro cantares que van salir en formatu dixital nos meses próximos y prepara’l que va ser el so primer videoclip en 16 años de carrera.

"La canción escoyida ye 'Ella nun escaez', que trata la vivencia d'una muyer sobre la Guerra Civil", esplica sobre esti tema, el primeru que van dar a conocer de los cuatro. La grabación va comenzar la selmana qu'entra y va encargase de la mesma la productora Cortexiphan, dirixida por Estela Cubilla y Arma X.

"Fainos especial ilusión porque ye'l primer videolclip que facemos d'un cantar de nueso", sigue Fernandi, que cuenta con que sía una realidá pa mediaos d’abril. Va ser nesi momentu cuando Musicasturiana comience cola so difusión en plataformes dixitales.

Darréu, espaciaes nel tiempu, dirán asoleyándose les trés restantes, toes grabaes en Tutu Estudios con Sergio Rodríguez. Éstes son ‘Sois la llume’, “un cantar de reivindicación femenista”; ‘Escoyí’, “de resistencia”; y ‘Traidor’, “que fala de la xente que vende a los sos compañeros de barricada”. “La llinia musical d’estos cantares sigue un poco la evolución que tuvimos en ‘Avante’, con metales potentes y lletres más adultes, anque en ‘Ella nun escaez’ y ‘Traidor’ buscamos esi soníu ska de bandes como Skalariak y Betagarri que siempre nos prestó tener”, esplica Fernandi.

“Teníemos dos temes más, pero decidimos grabar namái estos cuatro”, añade, ensin descartar que, nun futuru, puedan apaecer xunto con otros cantares nun discu “más como recuerdu qu’otra cosa”. “Grupos como Boikot yá faen lo de sacar namái en dixital. Nun hai tiendes onde vender los discos, que queden pa llevar al puestín nos conciertos o como carta de presentación”, esplica.

Lisboa y Maizu

Esti 2019 Skama la Rede sigue cola xira pol so decimoquintu aniversariu. Ésta va contar con cites dende abril, tando yá confirmaes actuaciones nel Festiva Máscara Ibérica (FIMI) de Lisboa en mayu y nel Maizu Rock el 29 xunu, onde va compartir escenariu con Dixebra y Escuela de Odio, ente otres bandes.

Contador Estadistiques