Skama la Rede presenta'l vienres el so videoclip

|
Videoclip 'Ella nun escaez' Skama la Rede

La banda actúa' esti sábadu en Xixón xunto colos madrilanos Núcleo Terco.

'Ella nun escaez' ye'l cantar escoyíu por Skama la Rede, ente los cuatro que tien grabao recién de cara a plataformes dixitales, pa rodar lo que ye'l so primer videoclip no sos más de 15 años de trayeutoria. Ésti ta producíu Cortexiphan, empresa dirixida por Estela Cubilla y Arma X, y va estrenase'l vienres a les 10 hores.

Al día siguiente, nel Bola 8, el grupu va participar nun conciertu entamáu con motivu del Día de la Victoria, 9 de mayu del 1945, xornada na que se conmemora la victoria soviética sobre l'Alemania nazi. Ésti va comenzar a les 20 hores y va contar tamién cola presencia de Núcleo Terco, banda de rock proletariu de Vallecas.

Les entraes tán a la venta a un preciu de 8 euros, anticipada, y de 10, na puerta. Éstes pueden mercase na sidrería Canteli, en Xixón, y nel Llar La Llegra, n'Uviéu, amás de na plataforma dixital Entradium.

Otres actividaes al rodiu la xornada

Dende mañana tán previstes otres actividaes al rodiu del Día de la Victoria, que van comenzar a les 20 hores con una concentración en Begoña frente al Teatru Xovellanos baxo'l lema 'Nun pasarán, facismu enxamás'. El vienres va proyeutase nel Centru Social Autoxestionáu Sestaferia, a les 19 hores, el documental 'Maximino Roda: Niño de la guerra', dirixíu por Luis Felipe Capellín, que va tar presente nel actu.

Pal sábadu, enantes del conciertu, ta prevista una xinta popular dende les 14.30 hores nel Centru Social Autoxestionáu La Llume a un preciu de 5 euros, que va contar con opción vegana. Darréu, a les 17 hores, Amaya Caunedo, Eduardo Abad y una persona de Madrid pendiente de confirmar van poner la charra 'Facismu ayeri y güei'.

Contador Estadistiques