Skama la Rede estrena la grabación de 'Escoyí'

El cantar nuevu del grupu va poder sentise esti sábadu nel XVI Asturies Nun Escaez, conciertu que repite n'Uviéu y que forma parte de la programación del DMR.

'Escoyí', yá disponible en YouTube y en Spotify, trátase d'un tema de resistencia grabáu por Skama la Rede en marzu xunto con otros trés cortes pa plataformes dixitales. El primeru n'asoleyase foi 'Ella nun escaez', que vieno xunto con un videolclip, el primeru del grupu, pa depués dar a conocer 'Traidor', quedando pendiente de difundir ‘Sois la llume’.

Mañana'l grupu va participar nel Asturies Nun Escaez, onde va compartir escenariu con Sartenazo Cerebral, que se va a encargar d'abrir el conciertu, y los vascos Radiocrimen, que van zarralu. Va ser na Sir Lauren’s, con actuaciones previstes dende les 20 hores y entraes a 8 euros, anticipada, y a 10, na puerta.

Actividaes dende güei

Esti festival históricu, nacíu nel añu 2000 en conmemoración de la Revolución d'Ochobre del 34, forma parta de la programación del Día de la Mocedá Revolucionario (DMR) qu'entama Darréu. L'actividá comienza esta tarde, a les 19 hores nel Llar La Llegra, con una charra a cargu de muyeres d’IKE y Modultec, y d’Euskalduna, de títulu ‘La llucha de les muyeres d’ayeri, exemplu pa la mocedá’, pa siguir mañana pela mañana con actividaes y una xinta popular que se treslladen a la zona asitiada tres La Llegra por mor de la negativa de permisu por parte del Conceyu pa usar la plaza'l Paragües, y una mesa redonda pela tarde.

Na semeya, Skama la Rede nun conciertu na Sir Lauren’s.