La esperada vacuna de la COVID-19 aportó a Asturies

Pepita, como tol mundu llama a Eulalia Josefa Paleo, de 80 años, foi la primer asturiana en recibir una dosis de la vacuna de la COVID-19, que da esperanza a la humanidá pa dexar atrás la pandemia. Un retrasu na distribución por parte de la farmacéutica Pfizer obligó a aplazar toles vacunaciones previstes pa esti llunes.

El domingu 27 d’avientu del 2020 ye una fecha que va pasar a la historia como’l principiu del fin de la pandemia de COVID-19 n’Asturies. Los mayores de la Residencia Mesta de Xixón, la más grande del país, y los sos trabayadores foron los primeros en recibir la vacuna desendolcada pola estauxunidense Pfizer y l’alemana BioNTech, con Pepita como primer voluntaria.

“Toi mui bien”, espresó tres recibir la primera de les dos dosis –la segunda ha de ponese en 21 díes, algamando la proteición 7 díes depués–, negando tener nervios o mieu a la vacuna. “Lo que taba yera agolmada por ser escoyida la primera”, bromió esta gallega que vieno a vivir a La Calzada de neña y qu’anima a los asturianos a que sigan los sos pasos “pol bien de toos”.

Problemes de loxística en Bélxica

Col actu d’ayeri na residencia de Pumarín entamó oficialmente la campaña de vacunación n’Asturies, que nesta primer fase ta destinada a centros residenciales pa mayores y con discapaciá, amás del personal sanitariu y sociosanitariu que-yos atienden. Sicasí, les previstes güei tuvieron que retrasase a mañana por un retrasu de les dosis por un fallu loxísticu de la fábrica de Pfizer en Puurs (Bélxica) na so distribución.

Los siguientes n’acceder a la vacuna van ser el personal sanitariu que trabaya en primer llinia énte la pandemia, el restu de profesionales de la salú y los grandes dependientes non institucionalizaos. La intención de la Conseyería de Salú ye que’l 60 por cientu de la población tea vacunada esti 2021.

Na imaxe, Pepita recibe la primer dosis de la vacuna que s'alministra n'Asturies. Semeya obra de POOL/ EFE/ J. L. Cereijido.