El Gobiernu va afitar nueves midíes “ríxides, contundentes y proporcionaes” énte la evolución de la tercer fola

Enantes del sábadu, a más tardar, el Gobiernu va comunicar restricciones nueves, que van ser “ríxides, contundentes y proporcionaes”, señaló Melania Álvarez García, vocera del Executivu. La evolución de la pandemia sigue aumentando y esmoleciendo, con 328 casos nuevos de COVID-19 el xueves y una tasa de positividá a 7 díes superior al 7 por cientu.

“Nun podemos esperar a que nos trague la fola”, rescampló la conseyera de Derechos Sociales y Bienestar, qu’anunció que Salú “ta preparando nueves midíes ríxides, contundentes y proporcionaes a la situación que tamos viviendo”. La intención ye anunciales a lo llargo d’esta tarde o mañana, p’aplicales la selmana qu’entra.

Esta decisión, que llega depués de qu’ayeri entraren a valir les restricciones nueves, col pieslle de la hostelería y tol comerciu a les 20 hores y l’adelantu del toque de queda a les 22, llega tres una xornada na que se detectaron 328 casos nuevos de COVID-19. Ye la cifra más alta de la tercer fola, superando los 319 del martes.

El Serviciu de Salú del Principáu d’Asturies (SESPA) fixó 4.603 pruebas de diagnósticu d'infeición activa, asitiando la tasa de positividá nel 8,32 por cientu. A 7 díes, el porcentaxe yá algama'l 8 por cientu.

4 finaos

Na xornada hai que llamentar la muerte de 4 homes de 93, 81, 75 y 60 años. Dende qu’entamó l’andanciu 1.398 persones –los datos oficiales contabilicen dos finaos más en díes previso non contabilizaos– perdieron la vida cola enfermedá causada pol coronavirus SARS-CoV-2.

Hai hospitalizaos 241 pacientes con confirmación o sospecha de COVID-19, 8 menos que’l miércoles, y otros 57 na UCI, 2 más que na xornada anterior.

7 biltos en residencies

La conseyería detectó ente'l 5 y el 11 de xineru un total de 7 biltos en residencies de mayores, 6 más que la selmana anterior, cuando hebo un únicu brotu. En total contabilizáronse 61 casos nuevos, ente internos y trabayadores.

Les autoridaes sanitaries intervienen cuando se da un primer contaxu, anque se cuenten como biltos cuando hai al menos trés. Nesi sen, nesti periodu confirmaróse casos n'otros 25 centros residenciales.

Na semeya, Álvarez García y Ana Cárcaba, conseyera de Facienda, na intervención depués del Conseyu de Gobiernu d'esta mañana.