Seis deteníos pol supuestu fraude en cursos de formación d’UXT, ente ellos Rodríguez Braga

La Guardia Civil entamó na mañana d’esti martes un operativu que llevó al rexistru de la sede d’UXT Asturies n'Uviéu y a la detención de seis persones, ente elles la del ex secretariu xeneral Justo Rodríguez Braga, fecha en Xixón. La investigación vien pol supuestu fraude coles subvenciones por formación que recibía'l sindicatu.

La Unidá Central Operativa (UCO), en collaboración cola Comandancía d’Uviéu, encargóse de los rexistros fechos a primer hora na sede de trés instituciones con domicilio social nel edificiu del sindicatu n’Uviéu: Unión Xeneral de Trabayadores (UXT), l’Instituto de Formación y Estudios Sociales (IFES) y la empresa Iniciativas para la Formación en Asturias (INFASTUR). D’esta forma buscábense pruebes sobre la supuesta práutica fraudulenta en materia de subvenciones públiques recibíes pal entamu de cursos de formación, investigación iniciada pola Fiscalía nel 2014 y denunciada un añu depués.

Al empar, deteníense a seis persones, ente los que tán Rodríguez Braga, secretariu xeneral d’UXT Asturies dende xineru del 2000 hasta mayu del añu pasáu. El restu son miembros del sindicatu o de les otres dos entidaes investigaes.

Informaciones de 'Atlántica XXII'

La revista de periodismu d’investigación ‘Atlántica XXII’ vieno denunciando estes práutiques d’UXT nes sos páxines nos años últimos. Esta posición provocó dellos problemes a la espublización, que tuvo qu’enfrentase a denuncies por parte del sindicatu que tuvieron a punto de llevala al zarru.

Namái’l sofitu económicu al traviés d’una campaña de cuestación popular pela rede permitió sobrevivir a ‘Atlántica XXII’ énte l’acosu d’UXT.

Semaya obra de Carmen Caballero Díaz baxo llicencia CC BY-SA 3.0.