El Xulgáu acepta la personación d'OCAN nel casu de les ayudes a la formación d'UXT

El so presidente, José Ángel Gayol, apunta qu'esta decisión va ameyorar la instrucción y el xuiciu de la causa contra'l sindicatu.

"Supón un impulsu del casu. Entendemos que siempre qu'OCAN se personó en procedimientos xudiciales en materia de corrupción, la instrucción y el xuiciu ameyoraron de manera considerable", afirmó Gayol tres conocer ayeri la decisión del Xulgáu d'Instrucción númberu 4 d'Uviéu. "La corrupción qu'afara al PSOE y a UXT esixe una aición contundente por parte de la sociedá civil y del poder xudicial", añadió'l voceru del Observatoriu Ciudadanu Anticorrupción (OCAN), que tien l'oxetivu "d'esclarecer el destín del dineru públicu que se marafundia en gastos suntuarios o redes clientelares".

Ente otros casos que citó Gayol, amás del de les ayudes de formación d'UXT, tán el casu Marea 2, el GITPA o "l'últimu que conocimos: el del alcalde d'Ayer, David Moreno Bobela, que se resiste a abandonar el so cargu, agárrase al puestu con un ansia norme, a pesar de que'l códigu éticu del PSOE diz qu'hai que dimitir cuando s'abre xuiciu oral". "Son diferentes llaos d'un mesmu polígonu de corrupción nel que'l PSOE y, per estensión, el so sindicatu de cabecera, UXT, tán atrapaos", criticó.