La xueza dexa en llibertá a Rodríguez Braga y a los otros cinco deteníos

Justo Rodríguez Braga y los otros cinco deteníos pol supuestu fraude en cursos de formación d’UXT Asturies quedaron en llibertá ensin midíes cautelares y baxo la calificación d’investigaos. L’ex secretariu xeneral del sindicatu, qu’exerció’l so derechu a nun declarar, aseguró a la prensa que los arrestos son “inesplicables”.

“Nun lo entendemos salvo que sía un circu mediáticu pa tapar lo de la Gürtel o lo del Yak-42”, afirmó Rodríguez Braga tres salir del xulgáu. La xueza Carmen Blanco dexó en llibertá al sindicalista y a los sos cinco compañeros esta mañana, tres pasar la nueche nel calabozu, qu’agora queden como investigaos pol supuestu fraude colos cursos de formación.

Amás de Rodríguez Braga, foron deteníos nuna operación de la Unidá Central Operativa (UCO), en collaboración cola Comandancía d’Uviéu, entamada na mañana d’ayeri n’Uviéu y Xixón y que llevó al rexistru de les sede de la Unión Xeneral de Trabayadores (UXT), l’Instituto de Formación y Estudios Sociales (IFES) y la empresa Iniciativas para la Formación en Asturias (INFASTUR) –con domicilio nel mesmu edificiu del sindicatu–, Carmen Caballero, Daniel Rodríguez Vázquez, Manuel Díaz Cancio, Alberto Gonzálezy Silvia Sariego. Nengún d’ellos aceptó declararar nel xulgáu, a esceición de Sariego, ex responsable d’alministración de la delegación asturiana del IFES.

Decisiones de “mui arriba”

Nes sos pallabres a la prensa, el secretariu xeneral d’UXT Asturies dende’l 2000 al 2016 afirmó que la decisión del rexistru y de les detenciones “vienen de mui arriba”. Darréu señaló que “nun tenemos nada qu’ocultar o de lo qu’avergoñanos” y aseguró que la postura del sindicatu foi en too momentu de collaboración cola xusticia.