‘P’anular los adioses’, de Lourdes Álvarez, meyor llibru de poesía del 2018 pa los Premios de la Crítica

La estaya de poesía de los XIX Premios de la Crítica d'Asturies, que reconoz a les meyores obres del 2018, foi pal llibru ‘P’anular los adioses’ de Lourdes Álvarez, editáu por Trea. Queda entá pendiente de conocer el ganador en narrativa, que se va fallar a lo llargo del mes, según comunicó l’Asociación d’Escritores d’Asturies.

L’autora de La Güeria algama asina ún de los premios más reconocíos de la nuesa lliteratura por ser otorgáu precisamente pol propiu coleutivu d’escritores. Failo con ‘P’anular los adioses’, un trabayu mui esperáu pol tiempu trescurríu ente la so espublización y ‘Mediando les distancies’ (2006), lo que-y permitió presentar el poemariu “más meditáu, más ellaboráu y cuidáu” d’Alvarez, apunten dende la editorial.

“Perfiláu nun momentu vital intensu –‘A la vuelta la vida / rasga la pena llarga’–, refuga l’escesu y lo circunstancial y marca la distancia afayadiza ente’l duelu vital nel que s’enmarquen la mayor parte de los poemes –escritos nestos diez años últimos– y la capacidá d’articulalos a la fin nun conxuntu coherente y sólidu”, añaden. Un poemariu, el d’Álvarez, qu’asocede nesti gallardón a ‘Hibernia’ (Saltadera), de Xaime Martínez.

En castellanu

A falta de conocer el merecedor del premiu na estaya de narrativa n’asturianu, l’Asociación d’Escritores d’Asturies anunció los ganadores na de castellanu nes dos categoríes. El meyor llibru de poesía espublizáu nel país nel 2018 nesti idioma ye ‘Pájaro herido’ (Bajamar), de Carlos Iglesias, mentes qu’en narrativa lleva’l gallardón ‘El inventor de sueños’ (KRK), d’Adolfo Casaprima.

La entrega de los XIX Premios de la Crítica d'Asturies ta prevista pal 17 de xineru nun actu nel que Pedro de Silva va recibir tamién el XIV Premiu de les Lletres d'Asturies.