Aida Escudero y José Ángel Gayol, merecedores de los XX Premios de la Crítica

L’Asociación d’Escritores d’Asturies (AEA) ta acabante de dar a conocer les dos obres que lleven los XX Premios de la Crítica na so estaya de llingua asturiana. En poesía’l meyor llibru del 2019 ye ‘Esti llugar qu’agora ye nuesu. Poemariu neanderthal’, d’Aida Escudero, y en narrativa ‘En primera persona’, de José Ángel Gayol.

Los xuraos de dambos gallardones aconceyaron ayeri de manera telemática. Los encargaos de decidir ente los poemarios espublizaos l’añu pasáu foron los escritores Lourdes Álvarez, Marta López Fernández, Xuan Xosé Sánchez Vicente y Inaciu Galán, ayalgueru de l’AEA qu’actuó como secretariu –cargu que cuenta con voz, pero non con votu–.

Tres destacar el so contentu pola bona participación y sobre manera pola calidá de les seis obres presentaes como candidates al premiu, lo que pal xuráu fala del bon momentu del panorama poéticu n’asturianu, tomóse por unanimidá declarar merecedor del premiu a la obra d’Escudero editada por Trabe. ‘Esti llugar qu’agora ye nuesu. Poemariu neanderthal’ ye un testu compuestu por 27 poemes que rescampla pol “so llirismu, que percuerre tol llibru, asina como la so calidá, la novedá temática de los poemes y el so frescor”, amás de “la orixinalidá del poemariu, nel peculiar contestu de la prehistoria”, apuntaron los encargaos del determín.

Nun ye’l primer reconocimientu qu’algama esti poemariu, yá que nel 2017 yá llevara’l Premiu Fernán Coronas de poesía, convocáu pola Sociedá Popular La Regalina de Cadavéu. L’autora nacida nel 1985 n’Uviéu foi tamién ganadora nel 2018 del Premiu Asturies Moza de poesía col ‘Familia con autorretratu al fondu’, y ye habitual de revistes como ‘Formientu’, ‘Larius’ o ‘Lliteratura’.

Escudero asocede como ganadora de los Premios de la Crítica nesta estaya a Lourdes Álvarez, que firmó’l meyor llibru del 2018: P’anular los adioses’.

Un diariu

Hora depués de principiar l’aconceyamientu pal premiu de poesía, foi’l turnu del de narrativa, estaya que l’añu pasáu quedara ermu. El xuráu tuvo conformáu por Dolfo Camilo Díaz, Rafa Rodríguez Valdés y Ánxel Álvarez Llano, con Víctor Suárez como secretariu.

Los escritores coincidieron na bona salú que tien anguaño’l panorama lliterariu asturianu y, tres un alderique sobre les cuatro candidates, decidieron por unanimidá conceder el gallardón a ‘En primera persona’, editada tamién por Trabe. Destaquen “el valor del xéneru que desarrolla: el diariu” y que Gayol presente una obra “homoxénea pese a la so variedá temática, bien pensada, na que nun se’escuende y s’amuesa una verdá cola que ye fácil empatizar”.

Con esti premiu, l’autor mierense del 1977 sigue acumulando reconocimientos, confirmándose como ún de los escritores más valoraos d’anguaño. Amás de ‘En primera persona’, asoleyó recién ‘El silenciu invisible’, col que ganó’l XXV Premiu Máximo Fuertes Acevedo d’ensayu, correspondiente al 2019 –yá lu algamara nel 2015 con ‘Vértigu. L’atracción del abismu na sociedá contemporánea’, a lo qu’hai que sumar el Xuan María Acebal de poesía del 2012 con ‘El llibru de les coses misterioses’–, y esti mesmu añu llevó’l XXIII Concursu de Cuentos pola Oficialidá del Asturianu de Bimenes con ‘Dalgunes posibilidaes de la domótica’.

Entrega en xineru

La entrega de los gallardones de l’AEA va tener llugar el 15 de xineru, siempre que les circunstancies de la pandemia de COVID-19 del momentu lo permitan. Esi mesmu día van recibir el so reconocimientu'l tamién mierense Juan Ignacio González, por ‘Los Jardines en Ruinas’ (Bajamar), como’l meyor poemariu en castellanu del 2019, y el restu de ganadores de los otros gallardones convocaos pendientes entovía de fallu.