Los XVIII Premios de la Crítica na estaya d’asturianu reconocen esti vienres a Xabiero Cayarga y Xaime Martínez

‘El cuentu atrás’, de Xabiero Cayarga, y ‘Hibernia’, de Xaime Martínez, son les obres ganadores de los XVIII Premios de la Crítica d’Asturies nes estayes de novela y poesía n’asturianu, de manera respeutiva. Los gallardones van entregase esti vienres n’Uviéu.

El llibru de rellatos curtios de Cayarga, con obra inédita y yá editada ordenada de los más moderno a los más antiguu, foi l’escoyíu pol xuráu del premiu qu’entrega l’Asociación d’Escritores d’Asturies como la meyor novela del 2017. Nel acta destaca de ‘El cuentu atrás’ (Saltadera) “el llinguaxe cercanu y coloquial asina como la narración en diferentes y múltiples rexistros. Una narrativa incisiva, atenta a los detalles y que s’adientra na singularidá del mundu individual frente a la realidá cotidiana y globalizada”.

Pela so parte, el poeta y músicu Xaime Martínez, qu’asoleyó recién con Araz –empresa editora d’Asturies.com– l’esitosu discu-llibru ‘Ósculos d’agua nel Imperiu Asturianu’, lleva’l premiu na estaya de poesía con ‘Hibernia’ (Saltadera). “La construcción clásica, el rigor formal y la frescura llingüística de la misma” foron los aspeutos que convencieron al xuráu.

Na estaya de castellanu, los meyores llibros del 2017 foron ‘Silencio tras el telón del sueño’ (Pez de Plata) en novela, obra de Mariano Antolín, y ‘Famélica legión’ (El Sastre de Apollinaire) en posía, escritu por Javier García Cellino. Mentes, el XVIII Premiu de les Lletres d’Asturies va, por unanimidá, p’Aurelio González Ovies “pola calidá, fuercia y prestixu de la so obra poética y por llevar les lletres asturianes fuera de les nueses fronteres”.

La gala d’entrega de tolos gallardones va tener llugar el vienres, a les 19.30 hores, nel Aula Magna de la Universidá d’Uviéu. Tolos premiaos van recibir una escultura nomada ‘Apolo’, obra de Jaime Herrero, y un diploma.