Pedro de Silva va recibir el XIV Premiu de les Lletres d'Asturies

|
Pedro de Silva con Javier Fernández

L'Asociación d'Escritores d'Asturies decidió por unanimidá conceder esti gallardón al presidente d'Asturies ente los años 1983 y 1991 "pola so trayeutoria lliteraria".

Pedro de Silva Cienfuegos-Jovellanos ye un reconocíu escritor en distintos xéneros, tanto narrativa como poesía, ensayu, teatru o artículos periodísticos. "La so voz en distintos tonos, crítica, incisiva, filosófica, irónica y tamién sentimental, emotiva y señardosa, distínguelu como un escritor singular, qu'arriquez coles sos variaes y numberoses obres el corpus de la nuesa lliteratura asturiana. La so voz singular ye una constante a lo llargo de tola so obra. La obra de Pedro de Silva tien ecu y llectores dientro y fuera de les nueses fronteras", destaquen dende'l coleutivu presidíu por María Esther García López.

La entrega del XIV Premiu de les Lletres d'Asturies va facese'l 17 de xineru. Nesa xornada l'Asociación d'Escritores d'Asturies tamién va entregar los XIX Premios de la Crítica d'Asturies, pendientes de fallu, nes sos cuatro estayes: meyor novela y meyor poesía n’asturianu y castellanu del añu 2018.

Na imaxe, De Silva en marzu mientres la presentación del so llibru 'La moral del comedor de pipas'. Semeya obra d'Armando Álvarez.

 

Contador Estadistiques