Asturies entra nes feches festives de Selmana Santa con 149 casos nuevos

La tasa de positividá diaria asitióse nun 6,82 por cientu esti martes. Llangréu yá activó'l zarru perimetral, nel que sigue Siero, que ta rexistrando un ameyoramientu de datos.

A falta de la espublización de los cifres oficiales de la pandemia de COVID-19, la Conseyería de Salú comunicó 149 contaxos ayeri –l'actualización aumenta esta cantidá en 8 hasta los 157–, 33 más que'l llunes. Asturies entra a les feches festives de Selmana Santa con una incidencia acumulada a 14 díes de 161 casos por cada 100.000 habitantes.

El Serviciu de Salú del Principáu d'Asturies (SESPA) fixo 2.728 pruebes de diagnósticu d'infeición activa, polo que la tasa de positividá s'asitió nun 6,28 por cientu, pol 5,22 por cientu de la xornada anterior. A 7 díes, esti porcentaxe'l llunes yera del 5,19 por cientu –ayeri aumentó al 5,44 por cientu–.

Hai que llamentar la muerte d'una muyer de 90 años y un home de 82 depués d'una xornada ensin finaos. Dende qu'entamó l'andanciu perdieron la vida cola enfermedá causada pol coronavirus SARS-CoV-2 1.895 persones –sumáronse 2 finaos más non contabilizaos de feches anteriores–.

Tán hospitalizaos 173 pacientes con confirmación o sospecha de COVID-19, a los qu'hai que sumar 61 ingresaos na UCI. Son 15 y 7 menos que'l llunes, de manera respeutiva.

Dos conceyos en 4+

Llangréu activó güei per 14 díes les midíes del nivel d'alerta 4+, como'l zarru perimetral y el pieslle del interior de los chigres. Ye xunto con Siero los dos únicos conceyos en riesgu estremu.

Pa consultar los indicadores de tolos llugares y les midíes vixentes en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

Un biltu en residencies

Salú detectó ún biltu en residencias de persones mayores biltos de coronavirus, lo qu'implica más de trés casos, depués de cinco selmane siguíes ensin ellos. Foi concretamente en Llangréu, con 8 afeutaos, de los qu'ún acabó ingresáu, siendo'l restu asintómaticos.

Del 23 al 29 de marzu rexistráronse 13 positivos en 11 de los 270 centros qu'esisten n'Asturies, onde toles persones que quixeron recibieron la vacuna, asina como 7 finaos con PCR positiva con domiciliu nellos, mesma cantidá que la selmana anterior.

Na semeya, vacunación con AstraZeneca a menores de 65 años ayeri nel Hospital Vital Álvarez Buylla de Mieres.