Mieres aprueba la ordenanza d’asturianu definitiva tres les alegaciones del PP

El Plenu de Mieres dio’l preste a una ordenanza d’asturianu nueva tres les alegaciones presentaes pol Partido Popular (PP) a la aprobada'l 25 de mayu. Éstes tienen pequeñes modificaciones pa evitar que se valte nos tribunales nel casu de que se recurra, un pasu que yá anunciaron los populares mierenses.

Diez meses depués, Mieres torna a aprobar la ordenanza d’asturianu, que yá va ser la definitiva. Les alegaciones presentaes pol PP a la primera llevó al equipu de gobiernu “a solicitar un informe xurídicu esternu pa nun pillanos los dedos nel casu de que se quixera llevar a los tribunales, como yá anunció nel Plenu’l PP”, esplica Faustino Zapico, conceyal d’Educación, Participación Ciudadana, Política Llingüística y Memoria Democrática.

Ente los argumentos daos polos populares tán un supuesta oficialidá encubierta o defeutos de forma, en concreto un informe qu’acompaña al espediente que namái ta escritu n’asturianu. “Yá les alegaciones teníen munches chancletaes y siguen colo mesmo”, apunta l’edil d’Izquierda Asturiana (IAS), que rellata cómo una de les quexes de la formación conservadora ye qu’un cargu del Conceyu nun pues espresase en llingua asturiana, namái na castellana: “siguiendo esa idea, si un conceyal de Mieres viaxa a Valonia y quier falar en francés, nun podría; debería emplegar el castellanu”.

Pese al más que previsible recursu, dende l’equipu de gobiernu decidieron “tirar p’alantre cola ordenanza con estes modifaciones, yá que ye la solución posible según el marcu llegal pa los conceyos, que ye la Llei d’Usu”, destaca Zapico, qu’añade que “nel casu de que se valtara nos tribunales quedaría amosao lo que yá sabemos; que la Llei d’Usu ye papel moyao”. El testu nuevu aprobóse definitivamente'l xueves con 16 votos a favor, los de los ediles del PSOE, Somos Mieres y l’equipu de gobiernu d’IX –ausentáronse por temes llabores dos conceyales–, y 3 en contra, los del PP.

Serviciu de Normalización Llingüística

Tres fortalecer la llegalidá de la ordenanza d’asturianu, l’oxetivu próximu del Conceyu ye dar continuidá tol añu al Serviciu de Normalización Llingüística, qu’anguaño namái tien presupuestu pa furrular per trés meses. “Los presupuestos d’esti añu diben ampliar el so periodu de funcionamientu a seis, pero la prórroga dexólo otra vegada en trés. La nuesa idea ye dar con una fórmula pa que tea l’añu enteru o al menos más tiempu”, espresa Zapico, que considera que d’esta forma podría dase’l siguiente pasu necesariu p’afitar l’usu del idioma en Mieres: la ellaboración del Plan de Normalización Llingüística.