“El PP saca pechu cola Llei d’Usu y al empar ta en contra del emplegu del asturianu”, critica Zapico

|
Entrugues PP de Mieres usu del bable

El PP de Mieres protagonizó un episodiu esperpénticu nuevu al entrugar al equipu de gobiernu nel Plenu por un supuestu usu “en exclusiva del bable” nel conceyu. Mientres, los servicios xurídicos municipales trabayen nuna solución tres el recursu de Delegación del Gobiernu estatal que tien valtada la ordenanza d'asturianu.

“Estando en Asturias, si no me he perdido o las vaciones me han desorientado que todo puede ser, el idioma oficial de nuestra comunidad es el Español sin que comparta oficialidad con lengua alguna. Si bien el asturiano goza de estatus de lengua de especial protección gracias a un gobierno autonómico del Partido Popular, esto no implica la utilización en exclusiva del bable”, rezaba’l testu rexistráu pol voceru José Manuel Rodríguez González y la conceyala Beatriz Llaneza. Darréu, trés entrugues, nes que destaca la tercera: “¿El objeto de ciertas publicaciones o programas es que se entere todo el mundo de las mismas, o va solo dirigido a un tipo de público con capacidades varias para los idiomas lenguas o dialectos”.

“Tanto les formes como’l tonu utilizáu son bastantes ridículos”, afirma Faustino Zapico, qu’añade que’l testu “nun tien nin pies nin cabeza”. Apunta que les quexes populares pol usu del asturianu vienen “por un cartafueyu cuatrimestral cola programación cultural del conceyu que se vien sacando dende hai quince años y por un cartelón informativu na fachada de la Casa Cultura. Nel restu d’árees nun s’emplega l’asturianu como yo desearía, sacantes en Festexos”.

Con ironía respondió nel Plenu a les entrugues el conceyal d’Educación, Participación Ciudadana, Política Llingüística y Memoria Democrática, que critica que’l PP “saca pechu cola Llei d’Usu y al empar ta en contra del emplegu del asturianu”. D’igual forma llamenta que la ordenanza d’asturianu tea paralizada tres el recursu de la Delegación del Gobiernu estatal n’Asturies, puestu mientres la etapa popular, situación que ta siendo estudiada polos servicios xurídicos municipales en busca d’una solución.

Otra manera, el Serviciu de Normalización Llingüística ta anguaño paralizáu tres la salida del téunicu al recibir una ufierta llaboral estable. “La precariedá que viven tolos SNL del país da pie a estes situaciones”, apunta Zapico, que considera necesario dar estabilidá al de Mieres mientres tol añu p’afitar una política llingüística nel conceyu.

Contador Estadistiques